Takunnittut ikipput
Arnamik kalaallimik 21-nik ukiulimmik Københavnimi pinngitsaaliisimaneq politiit suli misissorpaat. Takunnissimasinnaasunik nalunaartoqarsimagaluartoq, annertunerusumik paasissutissaqarsimanngilaq.
Arnaq inuusuttoq Danmarkimi feeriarnerminut atatillugu illoqarfimmeereerluni, sapaatiummat ullaassakkut angerlarniarsarisimavoq.
Qimuttuitsut unittarfianut ingerlatilluni, angutit inuusuttut sisamat ungusimavaat, matorsualimmullu eqqussinnarlugu angummit 20-it missaannik ukiulimmit qallunaangasumit, isiginnaartulerluni pinngitsaalineqarsimalluni.
Pingitsaaliisimaneq danskit tusagassiuteqarfiinit sammineqangaatsiaraluartoq, takunnissimasinnaasunik suli saaffiginnittoqanngitsoq, Københavnimi city-stationimeersoq Per Mejrup oqarpoq. Kingusinnerusukkulli Ritzau nalunaarpoq takunnittunik nalunaartoqarsimasoq.
Arnap inuusuttup Københavnimi illoqarfik ilisimarpiannginnamiuk, sumerpiaq pinngitsaaliineq ingerlanneqarsimanersoq arnap oqaatigisinnaasimanngilaa. Arnap inuusuttup mobiltelefonini tammaanerarpaa, taannalu kisiat atorlugu misissuineq nanginneqarsinnaasoq politiit oqarput.
