Takunnissimasinnaasunik suli ujaasipput
Nuummi angummik politiimik tallimanngornermi unnukkut saassussisunik takunnissimasinnaasunik politiit suli ujaasipput. Saassussineq pivoq niuertarfiup Oles Varehus-ip imerniartarfiullu Maximutip akornanni.
Allattoq Louise M. Kleemann
aggustip 21-at 2008 07:57
Angut politeeq sulinngiffeqarami politiitut uniformeqarani angutinit pingasunit saassunneqarpoq. Angutit inuusuttut saassussisut tamarmik tikkortunik naatsunik nujaqarput 170 cm-it missaannik angissuseqarlutik tamarmillu 20-it missaannik ukioqarunarlutik.
- Suli takunnissimasinnaasunit saaffigineqanngilagut, assulli saaffigineqarusukkaluarluta. Tallimanngormat unnukkut qulingiluat missaanni inunnik pasinarsinnaasunik takusaqarsimasut Nuummi politiinut saaffiginneqquneqarput, taama nunatsinni politimesterip tullersortaa Morten Nielsen kajumissaarivoq.
Saassussineq pillugu paasissutissiisinnaasut Nuummi politiinut sianeqquneqarput 32 14 48-mut. 32 14 48-mut.
