Takorniartitsisartut: Umimmanniarneq takornariartarfinniunngitsoq
Kangerlussuarmi umimmanniartarneq takornariat ornittagaanniit ungasinnerusumi ingerlanneqartariaqarpoq. Taama Kangerlussuarmik takornariartitsisartitsivik World of Greenland isumaqarpoq.
- Piniartoqartariaqartoq paasilluarsinnaavarput. Tamannali takornariartitsinermik inuussutissarsiuteqarnermut aserorsaataavoq, piniarneq taama annertutigissappat, allaat umimmaat takornariartarfinnut anngutissanatik, taama pisortaq Christian Frimodt-Møller sermitsiamut oqarpoq.
Qaammatip aallartilaarnerani arfernik takornariartitsisartut arfanniartarneq arfernik takornariartarfinni pisannginnissaa kaammattuutigaat.
Christian Frimodt-Møllerillu tikkuarpaa siusinnerusukkut umimmaat biilerluni qanillineqarsinnaasarsimagaluartut maanna 5-7 kilometerisut ungasitsigisuniittartut.
Taassuma aamma piniartut piffissamut piniarfissamut sumiiffinnillu piniarfioqqusaanngitsunut ataqqinninnginnerarlugit uparuarpai:
- Takornarissat umimmappassuit piniarfigeqqusaanngitsuni toqunneqarsimasut takusimallugit uannut oqaluttuartarput.
