Takorniartitseqatigiit takornariartaatilinnit ataatsimeeqateqarluarpoq
Takornariartaassuit aaqqissuusseqatigiillutik angalasarnissaannik Imarsiornermut Qullersaqarfiup siunnersuuteqarnera, takornariartaassuarnik umiarsuaatileqatigiit, USA-mi Miami-mi ulluni makkunani saqqummersitsinersuarmi peqataasut, annilaarutiginngilaat.
Visit Grenlandimi takornariartaassuarnut tunngasunut attaveqaqatigiinnermullu siunnersorti, Malik Milfeldt, saqqummersitsinermi najuuppoq.
Taannalu oqaluttuarpoq, takornariartaassuit aaqqissuusseqatigiillutik angalasarnissaannik Imarsiornermut Qullersaqarfiup maanna inassuteqarnera, takornariartaatinik umiarsuaatileqatigiit iluarisimaarneruaat.
- Ajunngilluinnartumik tiguaat. Takornariartaassuit ataqatigiissaarlutik angalasalernissaannut atortorissaarutissaqareerpoq. Paasineqartariaqarpoq. Umiarsuarsuarni takornariartitsisarnerup isumannaannerulernissaa piginnittut soqutigilluinnarmassuk. Ataatsimullu isigigaanni, umiarsuarsuit sumiinnerinik sinerissami nakkutilliisoqarfiup paasissutissinneqartuarnissaanut isumaqataapput, Malik Milfeldt oqarpoq.
Taamaassappat aaqqissuusseqatigiilluni angalasarnissaq umiarsuit ullumikkut kiffaanngissuseqarnerannik killiliissaaq.
Imarsiornermik Qullersaqarfimmit isumaqarput, aaqqissuusseqatigiilluni angalasalernissap kinguneriumaraa, sumiissusersiutit atorlugit qularnaarneqartalissasoq, umiarsuarnik annerusunik ungasinngitsumiittoqartuaannalissasoq. Taamaalilluni ajunaartoqalissagaluarpat ikiuunnissamut piareersimasoqartuaannalissammat.
Aaqqissuusseqatigiilluni angalasalernissamut isummersuut, umiarsuaatileqatigiiffinnut qimaasitsiunnanngitsoq, Malik Milfeldtip oqaatigaa.
- Naamerluinnaq. Ajornartorsiutaanngilluinnarpoq. Sinerissamik nakkutilliisoqarfimmiit taamaattumik piumasaqaateqalissagaluarpat, suleqatiginnissutigerusuttupilussuuaat, Malik Milfeldt oqarpoq.
Umiarsuarnik takornariartarneq pillugu Miamimi saqqummersitsineq, Visit Greenlandip Nunatsinnut angalasartussanik nutaanik pissarsinissamut anguniagaqarneranut tunngassuteqarluinnarpoq. Tamannalu anguniagaq iluatsilluinnartumik, Malik Mildfeldtip ingerlanerarpaa.
- Tamannaana pillugu maaniippugut. Umiarsuaatileqatigiimmillu takornariartaassuaatilimmik, Nunatsinnut suli angalatitsisalinngitsumik, ullumi pingaarutilimik ataatsimeeqateqassaagut. Taanna umiarsuaatileqatigiit nunarsuarmi anginerpaat tulleraat, naapinnissaallu pissangatigeqaarput.
Taakkua illinnartunik nerisassiortarneq immikkut sammisaraat, uagullu isumaqarpugut, Nunatsinni nakuuffeqarluta, aalisartut piniartullu pitsannik tikiussisarmata. Naapikkutsigillu tamakkua eqqartussavagut.
Umiarsuarnik takornariartarneq pillugu saqqummersitsineq taaguuteqartoq: Cruise Shipping Miami, ippassaq aallartinneqarpoq aqagulu naammassineqassalluni.
