Takornarniat pitsaanerusumik sullinneqartarnissaat ujartorneqarpoq
Mittarfiit allineqarnissaat, Kangerlussuarmi Nuummilu aallartarfiit tikittarfiillu nutaat pitsaanerillu, taavalu umiarsuarnut takornarniutinut tulattarfiit pitsaanerit, tamakkuupput Kalaallit Nunaanni takornarniaqarnermik Inuussutissarsiornermullu Siunnersuisoqatigiit aggustip ulluisa 30-anni 31-annilu ataatsimeersuarneranni kissaatit eqqartorneqartut.
Air Greenlandip USA-mi Baltimore-mut timmisartuussisalernissaa, aappaagu 2007-imi upernaakkumiit aallartinneqartussaq neriulluarfigineqarpoq, takornarniat aasakkuinnaanngitsoq takkuttuartalernissaat neriuutigineqarluni.
GTE-mili pisortap, Stig Rømer Wintherip,Kalaallit Nunaanni mittarfeqarfinnut tunngasunik arlalitsigut ajornartorsiuteqarsinnaaneq takusinnaanerarpaa, takornarniaqarnerup siuarsarneqarnissaa tassuunakkut killilersimaarneqarsinnaasoq unnerlugu, politikerillugooq tamanna piaartumik aaqqiivigisariaqarpaat.
Mittarfiit ilaasa allineqarnissaannik eqqarsaatip piviusunngortinneqarnissaa eqqaaneqarpoq, taavalu Nuummi, pingaartumilli Kangerlussuarmi, tikittarfiit aallartarfiillu ullutsinnut naleqqukkunnaarsimanerat aamma eqqaaneqarpoq. Taakku allineqarnissaat sukkanerpaamik pisariaqarpoq, takornarniat piumasaqaatigisinnaassaannut naleqquttunngorsarlugit.
Umiarsuarsuit takornarniat Kalaallit Nunaannut angallatigisartagaat pitsaanerusunik talittarfiliuuttariaqarput, tamakkumi tikittarnerat akulikilliartuinnarpoq.
Kangerlussuarmi niusarfiit puttasut pisuinnaallu ikaartarfii nutartertariaqarput.
Kisiannili Kujataani, pingaartumillu Qassiarsummi, takornarnianut atugassarititaasut pitsanngorsartariaqarput.
