Takornariat ukioq manna amerleriarput
Qaammatit arfinillit ingerlanerani takornariat tikissimasut nalunaarsorneri 11 procentimik qaffariarsimavoq.
”Nuummi tikeraarusutatsinnik nalunngisaqarpugut, fjernsynimilu Kalaallit Nunaat pillugu aallakaatitat takujuartarpagut allaaserisarpassuillu atuartarlutigit,” apriilimi nunatsinnut takornariarsimasoq Ulla Larsen oqarpoq.
Taanna isumaqarpoq, utoqqalinersiaqartuulluni bilitsi affaannarmik akilik unamminartuusoq. Forsikringimigooq ilanngullugu Kalaallit Nunaaliarneq 5.000 koruuniinnarmik akeqartoq akisugisassaanngimmat.
Taakku inooqannilu marluullutik nunatsinnut takornariarnerisa 2005-imi ukiup affaata ingerlanerani takornariaqarnerup 11 procentimik qaffanneranut sunniuteqaqataapput.
Ukioq mannami takornariat 13.500-t nunatsinniissimapput, taakkulu pingajorarterutai 60-t ataallugit ukioqartuupput.
Taamatullu ukioqartorpiaat takornariartitsisartut toraagarivaat.
”60-t sinnerlugit ukiullit arlalippassuit illuminnik akilersuinerminni unikaallatitsisimasuupput, taamaalillutik angalanissaminnut akissaqartorujussuusarput. Taamatullu ukioqalersimasut siunnerfittut takornariartitsivimmiit toraagaraagut”, taama oqarpoq Greenland tourismip pisortaa Stig Rømer Winther.
Taanna aamma erseqqissaavoq, taama qaffariaateqarneq timmisartukkut ingerlatsinermik peqquteqartoq.
”Isumaqarpunga nunanut allanut avammut neqerooruteqarnerput sunniuteqarsimasoq. Tamannalu Air Greenlandi Arctic Umiaq Line hoteliutillillu arlallit suleqatigalugit sulissutigisimavarput”, Stig Rømer Winther nassuiaavoq. Nangipporlu:
“Inuit aamma aningaasaateqarneruleriartorput, taamaalilluni nunatsinnut angalaneq akisugaluaqisoq taakkununnga inornarpallaarunnaarsimammat Air Greenlandimiit bilitsit akii affaannanngortinneqarsimapput.
Taamatuttaaq nunani allani ornigineqartuni pinerliiniartoqaqattaarnera toqqissisimassutaajunnaarmat inuit avannarpasinnerusumukarusulersimanerat peqqutaaqataavortaaq”, Stig Rømer Winther oqarpoq.
Stig Rømer Wintherip oqaatigisinnaanngilaa, takornariat taama qaffariarnerisa nunatsinnut aningaasatigut qonorpiaq isertitaqaataasimanera. Qularutiginngilaali ukiup naanerani milliartit affaat angullugit isertitaqaataajumaartoq.
