Ilulissani takornarianik qulimiguulimmik sermersuarmut upernaaq manna timmisartuussisoqartassaaq, takornarialli qulimiguulik mikineq naammagiinnartariaqassavaat.
Tamatumunnga pissutaavoq Air Greenlandip qulimiguuliutaa S-61, qanittukkut sermersuarmut takornarianik timmisartuussitilluni Ilulissat Kangerluani, Kangiani, mipiloortup aasaq manna suliarineqarnera takornariaqarnerup aallartinnissaanut naammassineqarsinnaanngimmat.
Taamaattumik Piginneqatigiiffik aalajangiisimavoq qulimiguullit ingerlaarfiinik annikitsumik allannguisoqassasoq, taamaalilluni Ilulissani takornariarpassuit sermersuarmut nuannarineqaqisumut timmisartuunneqartarnissaat neqeroorutigineqarsin-naalerpoq.
S-61-mut taarsiullugu takornarianik timmisartuussisarnermi Bell 222-t qulimiguullit marluk, arfineq pingasunik tamarmik ilaasoqarsinnaasut, atorneqassapput. Taama aaqqiisoqaraluartoq timmisartuussisarneq ataatsimut isigalugu annikilleriaateqassaaq.
Takornariallu silaannarmiit taamaalillutik sermersuaq misigisaqarfigisinnaassavaat.
Taama Air Greenlandimiit ilisimatitsipput, takornarianik timmisartuussisarnissamik incomingselskabimik, World of Greenlandimik, Ilulissani isumaqatigiissuteqarsimasoq.