Takornariat tikinnissaannut innuttaasut piareersimanngippallaarput

Nunarput aatsaat taama amerlatigisunit umiarsuarsuarnit takornariutinit ukioq manna tikeraarneqassaaq. Juulimimi aggustimilu kitaanut tunumullu takornariussuit 24-t tikittassapput. Taamaakkaluartoq sanaluttartup takornariat sanaluttarfimminnut iseraangata aatsaat paasisarpaa takornarianik tikittoqartoq.

- Innuttaasut akuutinneqanngippallaartut, Ilulissani politikeri isumaqarpoq.

Ilulissat Kommuniani Kultureqarnermut Ataatsimiititaliap siulittaasua Bernhardt Olsen oqarpoq innuttaasut akuutinneqarnerat annerusumik malunnartorsiffigineq ajoritsik.

Aamma taamatungajak sanaluttartoq Kristian Fly oqarpoq, taanna kommunip sanaluttarfiani sanatillutik umiarsuarnik tikittoqartarnera annerusumik misigisimaneq ajornerarpaa.

- Taamaallaat sanaluttarfimmut takornariat iseraangata paasisarparput tikittoqarsimasoq, oqarpoq.

Ilulissanut umiarsuit tikittussat juuliinnarmi tallimaapput aggustusimilu 19-iullutik.

Qularnanngilaq taama misigisimasut arlaqassaqisut. Apeqqutaaginnarporli pitsaasumik ataqatigiissaarinissaq, taama oqarpoq, Nuummi takornariartitsivimmi Tikilluarit-mi pisortaaneq Flemming Nicolaisen.

Nuummi tammajuitsuerniat sanalukkanillu niuertarfiit suleqatiginerisa saniatigut, kalaallisoortunik Nuutoqqami tikkilluaqqusitsitsisoqartarneq Nuummi aallartinneqarpoq. Inuttaasut namminneq piumassusertik atorlugu aamma suleqataapput.

-Ataaseq cafeterialiorniarpoq silami. Arlaannik sassaalleerusuttut aamma ukioq manna amerlanerullutik; ataqatigiissaarilluta ataatsimiikkaangatta paasinarsivoq ukioq manna annertunerusumik tikilluaqqusisartussaasugut. Tammannalu aamma qujanartorujuuvoq, Flemming Nicolaisen oqarpoq.

Tikilluarit ukiorli ataqatigiissaarisoqalersimavoq, taakkualu naapillattaarsimapput, susassaqatigiit assigiinngitsut katersorneqarsimallutik.