Takornariat moderniusut inuilaarsuarmiikkusunnerat eqqarsarnaraat
Ukioq 2010-mi takornariat moderniusut nunami issittumi inoqanngitsumi imaannaanngitsumilu feeriarlutik takusassarsiortarnissartik anguniarpaat.
Kisiannili piareersimasut qimallugit tamaangarujussuaq aallarnissap inuunermik akeqarsinnaanera immikkut paasisimasallit miarnersoqqussutigaat, taama allappoq atuagassiaq Ingeniøren.
- Umiarsuarujussuit takornariartaatit sumiiffinni ajutoortoqassagaluarpat ikiortissaqarfiunngivissuni angalaartarput. Takornariat siornatigut inuit tikissimanngisaannagaannut ingerlaniartarput. Tamanna aaqqissuussisunut aningaasatigut iluanaarutaasarpoq taamaaliortarlutillu, taama oqarpoq kontreadmiral Henrik Kudsk Christiansborgimi nunani issittuni isumannaatsuunissaq upalungaarsimanissarlu pillugit tusarniaanermi.
Pingaartumik umiarsuarujussuit takornartaatit amerligaluttuinnarnerat Henrik Kudskip oqarnera naapertorlugu ulorianartorsiortitsivoq, taannalu isumaqarluni, umiarsuit amerlaqisut "isumannaatsuunngitsumik" angalasartut. Assersuutigalugu soorlu avannarpasippallaaq sikumullu qanittoq tikivillugu ingerlasarlutik.
Imarsiornermut aqutsisoqarfiup aammattaaq pisoq imaannaanngitsorujussuartut isigaa.
- Umiarsuit ataasiakkaat politiinut nalunaarutigisimavavut ilulissanut qanippallaarlutik isumannaatsuunngitsumik ingerlasarmata. Suliassaq Kalaallit Nunaanni politimesterimiippoq, allaffiup pisortaa Per Sønderstrup Ingeniørenimut oqarpoq.
Imarsiornermut aqutsisoqarfik nunat tamalaat pilersaarutaanni peqataavoq, tamatumani imartani iluliaqartartuni angalanissamut malittarisassat nutaat ilimagineqarlutik. Malittarisassat 2014-imi aatsaat atuutilissasut ilimagineqarpoq.
