Takornariat Ilulissiarusunnerupput
Siullermilli Nuummut saariarta:
- Upernaaq manna maani Nuummi ukiut siuliinut naleqqiullugu takornariaqarpallaanngilaq. Takornarialli Ilulissanut ingerlaqqinnginnerminni maanga aqqusaartut ulluni kingullerni amerliartortut malugaarput, Jon Krogh Nuuk Tourism-imi pisortaagallartitaasoq oqarpoq.
Takornariallu Nuummut aqqusaartut annertunerusumik pisiaqarusunneq ajornerarpai:
- Takornariat aaqqissuussatsinnik, akiliillutik assersuutigalugu angallammik angalaartitsinernik pisiaqarnissaminnut tunuarsimaarnerusut malugaarput. Maani Nuummi silarloqattaarnikuunerput tamatumunnga patsisaasoraara. Anorersuartillugu siallertillugulu angallammik angalaarussinernik tunisaqaruminaattarami.
Umiarsuillu takornariartaassuit ukiualunnguit matuma siorna nunarsuatsinni aningaasarsiornerup ajalusoornerata kingunerisaanik ukioq manna ikilisimanerarpai:
- Takornariat umiarsuarnik takornariartaassuarnut ilaaniartut ukiunik marlunnik sioqqutsillutik bilitsisereertarput. Taamaattumik 2008-mi 2009-milu nunarsuarmi aningaasarsiornerup ajalusoornerata kinguneri, takornariaqarnerup tungaatigut maanna malunniuteqqapput, Jon Krogh nassuiaavoq.
Umiarsuit takornariartaassuit 33-niit affangajaanut tassa,18-inut ikileriarsimapput. Umiarsuilli takornariartaassuit tikittussat anginerulernikuupput. Taamaattumik umiarsuarnik takornariartaatinut ilaallutik takornariartartut 2000-iinnarnik ikileriassapput.
Ilulissanulli takornariartartut amerliartorput, aasaq mannalu aatsaat taamak takornariaqartiginissaa ilimagineqarpoq:
- Takornarialerinissaq annerpaaffissaa tikipparput. Taamaattumik isumernissaq siusilaaraluarluni takornariaqarnermi sullitallit isumasiorneranni takutippaat takornariaqarnerup ingerlanera pissusissamisut ingerlasoq. Ilaatigut allat oqarput aatsaanngooq taamak amerlatiginiarput, ilaallu oqarlutik kingusinaalaaraluarlutik maaniinnissaat sivisunerusoq, Konrad Seblon Destination Avannaani takornariaqarnermi ineriartortitsinermi pisortaq oqarpoq.
Ilulissani takornariaqarluartarneq ima nassuiarpaa:
- Ilulissat kangerluat pingaarutilerujuuvoq. Kisianni Ilulissat kangerluat pigigaluarlugu takornariat maanga tikikkaangamik sullinneqarnerat pingaarnerpaajuvoq. Maani takornariaqartitsiviit arlaqartut, toqqaannartumik piaartumillu kiffartuussilluarnerat pingaarutilerujuuvoq. Ajunngitsumillu ingerlasimammat takornariat ikiliartunngillat, Konrad Seblon naggasiivoq.
Nuuk Tourismemiillu Jon Krogh Nuummi takornarianik tikittoqartillugu niuerniartarfiit eqeersimaarnerusarnissaat ujartorpaa, assersuutigalugu sapaatikkut takornariaqartillugu ammasarnissaat siunnersuutigalugu.
