Takornariat ikileriassapput

2008-mut sanilliullugu takornariat 6.700-t missaannik ikileriassapput. Kalaallit Nunaannut takornariat taamaalillutik 50.000-t sinnilaaginnassavaat, 2008-mi 57.223-usimasut.

Sermitsiami ullumi saqqummersumi tamanna atuarneqarsinnaavoq.

- Angalatitseqatigiiffinnit assigiissumik nalunaaruteqartoqartarpoq, aningaasarsiornikkut ajornartorsiorneq Kalaallit Nunaannut angalaniartut ikinnerunerannut pissutaasoq. Feriarnermut inniminniinerit nalinginnaasumik siusinnerusukkut pisarput, ukioq mannalu kingusinnerujussuakkut pissapput, qularnanngilarlu aappaagu aamma taamaakkumaartoq, Kalaallit Nunaanni Takornariaqarnermut Inuussutissarsiornermullu Siunnersuisoqatigiinni pisortaq, Thomas Rosenkrans, Sermitsiamut oqarpoq.

Ikileriaatissat pingaartumik tassaapput takornariat timmisartumik Kalaallit Nunaaliartartut, umiarsuarnik takornariartaatinik takornariat annikinnerusumik ikileriassagunartut. Thomas Rosenkrans oqarpoq danskit kalaallillu angalanernik aaqqissuussisartut selskabip Københavnimi allaffiata ukioq manna kingusinnerusukkut naapissagai, oqaloqatigiissutiginiarlugu naatsorsuutigisamik ikileriarnissat pakkersimaarniarlugit ataatsimut qanoq iliuuseqartoqarsinnaanersoq.