Takornariat 14.000-it Qaqortumut aallassapput

Kisitsisit maannamut qulakkeerneqarsimasut eqquutissappata, takornariat umiarsuakkoorlutik tikittussat 14.000-it missaanniittut, qaqortormiut ukioq manna ulapputigalugillu nuannaarutigisinnaavaat.
Allattoq Hagen Højer Christensen
maajip 30-at 2013 04:41

Takornarialerisut Greenland Sagaland, Qaqortoq Tourist Service, kisitsisinik saqqummiussisuupput.
 
Umiarsuit takornariartaassuit 18-it Qaqortumut ukioq manna tikittussatut naatsorsuutigineqarput, taakkunannga 14-it Tysklandimeersuunngikkunik USA-meersuussallutik.
 
Greenland Sagalands naapertorlugu umiarsuaq takornariartaat "Fram", Norgemeersoq, ataasinngorpat juunip ulluisa pingajuanni siulliulluni tikissaaq, taannalu 280-inik ilaasoqassangatinneqarpoq.
Umiarsuit takornariartaatit Qaqortumut tikittussatut naatsorsuutigineqartut taava oktobarip qiteqqunnissaata tungaanut tikittaqattaalissapput, kingulliulluni tikittussatut naatsorsuutigineqartoq tassaalluni "Carnival Legend", USA-meersoq, 2100-nillu ilaasulik.
 
Umiarsuarni takornariartaassuarni Qaqortumut ukioq manna tikittussat akornanni annerpaaq aamma USA-meersuuvoq, tassa "Emerald Princess", 3100-nik ilaasoqarluni angalasinnaasoq tikittussatut naatsorsuutigineqarmat. Taanna Qaqortumut septembarip ulluisa 20-anni tikissangatinneqarpoq.
 
Umiarsuit takornariartaassuit 18-it Nuummut ukioq manna aamma tikinnissaat naatsorsuutigineqarpoq, takornarialli Qaqortumut naleqqiullugu ikinnerungaatsiartut ilaasorineqarnissaat ilimagineqarpoq, takornariat 6000-it missaat Nunatsinni illoqarfiit pingaarnersaannut tikissangatinneqarmata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq