Takornariat 14-it Ittoqqortoormiut eqqaani ujaarineqarput

Sinerissamik nakkutilliissut 'Ejnar Mikkelsen' ujaasinermi peqataajartoqqullugu piaarnerpaamik Illoqqortoormiut avannaannukaqquneqarpoq, aviisip Politikenip nittartagaani taama allaaserinnittoqarpoq.

'Ejnar Mikkelsen' maannakkut Tasiilap avannaaniippoq, aatsaallu ulloq unnuarlu atoqqaarlugit Illoqqortoormiut avannaannut, qajarissat ujarneqarfiannut apuussinnaassalluni. Qajarissat ujaarineqalersut ataatsimoornatik eqimattakkaarlutilli angalaarsimasut oqaatigineqarpoq.

- Ujaasinitsinni qulimiguulimmit ikiorserneqarsinnaanissarput misissorparput, nakkutilliissutip naalagaa Peter Holst-Andersen Politikenimut oqarpoq.

Ujaasisoqarnera politimesterip tulliata Morten Nielsenip KNR-imut uppernarsarpaa.

Taassuma oqaatigaa, tappavani ippassaq unnukkut tassanngaannaq sakkortuumik anorersualersoq, tamatumalu kinguneranik takornariat arfinillit Tysklandimeersut qajarissanik angalaartut ajornartorsiulersut.

Piniartut Illoqqortoormiormiut qajarissat ajornartorsiortut takusimavaat, silalu atoruminanngikkaluaqisoq, tyskit taakku arfinillit pujortuleeqqaminnik nunaliaallugit. Tamatuma kingorna takornariat taakku arfinillit illoqarfiliaanneqartut, Morten Nielsenip oqaatigaa.

Taassuma silap atoruminaannera eqqarsaatigalugu piniartut iliuusaat nuannaarutigeqaa:

- Piniartut pitsaalluinnartumik iliuuseqarput, Morten Nielsen oqarpoq.

Nutaarsiassaqartitsiviit takornariat 14-it qajarissanik angalaartut ujaarineqarnerarpaat, Morten Nielsenilli qajarissat qasserpiaanerinik oqaatigineqanngitsut anorersualernerata kingornagut suli tusarfigineqaqqinngitsut uppernarsarsinnaavaa.

Qajarissat attaveqarnermut atortorissaarutit nassataat politiinit attaveqarfiginiarneqaraluarput, maannamulli iluatsinngitsumik.

Qajarissanit ujaarineqalersunit ikioqqulluni kalerrisaarisoqanngilaq, maannalu sumiiffissiniarneqarlutik.