Takornariarumaneqarluartut aningaasaliiffigerusunngilaat

Kujataani takornariarumaneqarluartartut ilaat, issunik, ujaqqanik qisunnillu Qassiarsummi illuliat, tassa Thodhildep oqaluffiata vikinge-llu illorsuata, iigai aserortilersimasut aserfallatsaalineqartariaqalersimapput.

Kisianni suliarineqarnissaannut ajoraluartumik aningaasaliiumasoqarpasinngilaq.

- 300.000 koruunit missaaniittut atorfissaqartippavut, tassa Namminersornerullutik Oqartussanit ukioq 2000–imi kommunip tunissutisiai akisoqaat, tunniunneqannginnerini eqqarsaatigineqarsimarpasinngilaq illut ukiut tamarluinnaasa aserfallatsaalineqarnissaasa aamma aningaasartaqarnissaa, taama oqarpoq Gardar Foundation–ip illunik piginnittup siulersuisuini siulittaasoq Tina Jensen.

Narsap Kommunea ukiut tamaasa 71.000 koruuninik missingersuuteqartaraluartoq kisimiilluni suliassanik matussusiisinnaanngilaq. Taamaattumik Foundation-ip, Danmarkimi nunatsinnilu, aningaasaateqarfiit 20 –it 30 llu akornanniittut ukiarmili tapiissuteqaqqullugit qinnuteqarfigisimagaluarpai iluatitsiffiunngitsumik.

- Iluatitsinngikkutta illut aserfallalluinnassapput, Tina Jensen naggasiivoq.