Takornariartitsisartut piniartullu suleqatigiilerput
Takornariat arfernik takusassartillutik arfersuit alutornartut isiginnaartillugit arfernik angisuunik pisaqartarnernik misigisaqartittarnissaat taakkua annilaanngatigaat.
Maannali tassa Nuummi aalisartut piniartullu peqatigiiffiat illoqarfimmilu takornariartitsinermik suliallit Nuup eqqaani arfanniarnerup arfernillu takusassarsiortitsinerup ataqatigiissinnissaannik suliniuteqarnialerput.
Kikkut tamarmik, takornariartitsinermik suliallit piniartullu inissaqartinneqarnissaat suleqatigiit taakkua isumaqatigiissutigaat. Suleqatigiit aammattaaq arfanniarneq nungusaataanngitsumik ingerlanneqassasoq kiisalu arfanniat arfanniartillugit arfernik takusassarsiortitsisartunit ilanngullugit eqqarsaatigineqartarnissaat isumaqatigiissutigaat.
Nalunaarut, qipoqqarniarnermut tunngasoq ullumi atuutilerpoq, taamaalillunilu kommunip arfanniarnermut ileqqoreqqusaata ilusilersornissaa aappaagu aatsaat piffissaqarfigineqalissalluni. Siullermik suleqatigiit kommunalbestyrelsimut arfanniarneq pillugu inassuteqaatinik suliaqartussaq pilersinneqassaaq.
- Taamaattumik nuannaarutigaara takornariartitsinermik suliallit kiisalu aalisartut piniartut kattuffiat suleqatigiinnissamut piumassuseqarlutillu piginnaaneqarmata. Tamatumani takutinneqarpoq kommuniusugut kikkunnut tamanut inissalik, inuussutissarsiutitigut ineriartortitsinermut ataatsimiititaliami siulittaasoq Esmar Bergstrøm oqarpoq.
