Takornariartitsisaleqqaarneq pillugu atuagaq saqqummerpoq

Takornariaqarneq Kalaallit Nunaata maanna aningaasarsiorneranut pingaaruteqarnerpaanut ilaavoq, siunissamilu aamma taamaassalluni. Takornariaqartitsisarnerli qanoq aamma qanga aallartippa? Liisi Egede Hegelundip, Sisimiuni takornariaqartitsinermi pisortaasimasup atuakkiamini tamanna qulaajaaviginiarpaa.
Allattoq Mads Lynge
juunip 05-at 2009 07:54

Atuakkiaa ateqarpoq "Tikeraaq", takornariaqartitsisarnerullu 1952-imi aallartinneraniit maannamut oqaluttuassartaa atuakkiamini allaaseraa.

Islandimiut Nunatsinnut 1952-imi takornariartitsisalerput, Tunumut ulluinnarlugu takornariartitsisaleramik. Kujataanut kingorna takornariartitsisoqartalerpoq.

Kangerlussuakkoorlugu 1960-ikkunni timmisartuussisoqartalermat Kitaanut takornariartoqartalerpoq.

Nunatsinnut takornariartitsisarneq 1991-imi aatsaat aaqqissugaanerulerpoq, taamanikkulli siuariartortuarsimalluni.

Liisi Egede Hegelund takornariartitsinermut pisortatut siulliulluni Nunatsinni atorfeqartuuvoq, 1985-imi taamatut atorfeqalerami.

Nunatsinni takornariartitsisarnerup oqaluttuassartaa taamaasilluni misilittagartuumit atuakkiarineqarpoq, atuagarlu "Tikeraaq" ullumi saqqummissaaq, kalaallisut tuluttullu allagaalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq