Takornariartitsineq nalornisoorfiuvoq
Nunatsinni sinersortaatit ingerlaannarnissaanik nalornissuteqarneq nunatsinni takornariaqarnermut innarliisinnaavoq, taama Kangerlussuaq Tourismemi tuniniaanermut pisortaq Mogens Gislinge isumaqarpoq.
Mogens Gislinge takornariartitsinermillu suliaqartut allarpassuit, nunat avannarliit killiit takornariaqarnikkut ussassaarinersuannut Københavnimi Islandsbryggemi ullumimiit aallartittumi ilaavoq.
Nunatsinni aappaagu takornariartitsinerup qanorpiaq isikkoqarnissa nalunarpoq, Arctic Umiaq Line Air Alphalu Namminersornerullutik Oqartussanit tapiiffigineqartarunnaartussaammata.
Arctic Umiaq Line aamma takornariartitsisarfik Arctic Travel Group ussassaarinermut peqataapput takutitassaqarpiaratilli, Arctic Umiaq linep Arctic Travel Groupimit pisiarineqarsinnaanissaa suli nalunarmat.
- Tamanna tutsuiginanngitsorujusuuaavoq, sunamiuna tuniniarneqarniartoq? Mogens Gislinge Kangerlussuaq Tourismemeersoq aperaaq.
Nunat avannarliit killiit, tassa nunatta Islandip Savalimmiullu takornariaqarnikkut ussassaareqartigiittarneranni aatsaat taama peqataasoqartigaaq peqataasut 550 missaaniillutik.
