Takornariartaassuup nunatsinnukaassinissaraluinik tamanik taamaatitsisoq: Umiarsuaq ulorinarpallaarpoq
Danskit angalatitsiviata Albatrosip aaqqissuussaanik aggustimi septembarimilu nunatsinnukarlutik angalanissaraluaminnut qilanaaraluaqisorpassuit pakatserrapput.
Ilaaffissaraluammi takornariartaassuaq ulorianartutut norskit imarsiornermut Inngikitsulimmi oqartussaasuannit nalilerneqarami angallasseqqusaajunnaarallartinneqarpoq.
Takornariartaassuup ”Ocean Atlantic”-ip aasaq manna nunatsinnukaassinissaralui tamarmik taamaatikkitik, angalatitsivimmik Albatrosimik piginnittup pilersitsisullu Søren Rasmussenip KNR-imut uppernarsarpaa:
- Uggornaqaaq. Kalaallit Nunaannummi angallasserusukkaluaqigatta, taanna allappoq.
Takornariartitsiviup Visit Greenlandip takornariartaassuit tikittussat pillugit allattuivia naapertorlugu ”Ocean Atlantic” Qassiarsummi naggasiinertalimmik Tasiilamut aggustip tallimaani tikeriarluni nunatta sinnerani septembarip aqqaneq-aappaata tungaanut imarsiortussaagaluarpoq.
Takornariartaassuaq 23-nik ajoquteqartoq norskit oqartussaasuisa paasigaat
Takornariartaassuaq ”Ocean Atlantic” Longyearbyenimit avalaqqusaajunnaarallartinneqassasoq, norskit imarsiornermut Inngikitsulimmi oqartussaasuisa aalajangerpaat. Takornariataassuarmi taanna imarsiutigissallugu ulorinarpallaarpoq.
Norskit imarsiornermut aqutsisoqarfiata attaveqatigiinnermi siunnersortaa, Dag Inge Aarhus, norskit nutaarsiassaqartitsiviisa ilaannut NRK-mut taama oqarpoq:
- Takornariartaassuup atuuffia eqqarsaatigalugu pinngitsoorani aaqqissortariaqartunik ajoquteqarpoq. Pinartoqassagaluarpammi ikiorasuarneqarsinnaanngillat annaassiniarasuartoqarsinnaananiluunniiit, taanna oqarpoq.
Takornariartaassuaq 23-nik pinngitsoorani aaqqissortarialinnik ajoquteqartoq paasineqartoq, taanna ilanngullugu oqarpoq. Soorlu ikuallattoornermi kalerrisaarutinut atortorissaarutit, motooria pingaarneq, motoorit tapertaasut annanniutillu ajoquteqartunut ilaapput.
“Ocean Atlantic” 1985-imi atuutilersoq Ruslandimi Europallu kangiata sinnerani ikaartaataasimavoq. Kingullermik 2017-imi nutarterneqarpoq. 198-nik ilaasoqarsinnaallunilu 140-nik inuttaqarsinnaavoq.
Assi: Albatros.
Itsinermigut putulik
Takornariartaassuaq itsinermigut putoqartoq aamma paasineqarpoq.
Takornariartaassuullu itsinermigut putoqarnerata kingunerisaanik immattuullarmat inuttat iluarsartulertariaqarsimavaat.
Takornariartaassuaq ”Ocean Atlantic” Inngikitsullip eqqaani inuilaami pinartoqartillugulu orneriaannaanngitsumi imarsiortilluni itsinermigut putuvoq.
Taama pisoqarnera norskit imarsiornermut oqartussaasuinut nalunaarutigineqarsimanngilaq, tamannalu inatsisinik unioqqutitsinerulluinnartoq norskit imarsiornermut aqutsisoqarfianneersoq, Dag Inge Aarhus, aviisimut Svalbardposten-imut oqarpoq.
Takornariartaassuup itsinermigut putunera aaqqinneqareeriarpat angallasseqqissinnaanngornissaanut akuerineqassasoq naatsorsuutigisimagitsik, Albatrosimik piginnittoq Søren Rasmussen oqarpoq. Taamali pisoqanngilaq:
"Ocean Atlantic" arlalinnik ajoquteqartoq maajimi paasineqartoq, Skotlandimi umiarsualiveqarfinnut oqartussaasuneersoq BBC-mut oqarpoq. Ilaatigut inuttat umiarsuarmi isumannaallisaarnermut tunngasunik ilisimasaqanngitsut paasineqarpoq. Nittartakkakkut nutaarsiassaqartitsivik Polar Journal naapertorlugu "Ocean Atlantic" 52-init ikinnerunngitsunik ajoquteqartoq tuluit oqartussaasuisa paasivaat. Ajoqutit ilaat arfineq-pingasut ima ajortigisimapput allaat umiarsuaq angallasseqqusaajunnaarallartinneqartariaqarsimalluni.
- Itsinermigut putoqarami angallasseqqusaajunnaarallartinneqarpoq, putuneralu tamakkivillugu aatsaat aaqqissorneqareeriarpat angallasseqqissinnaalissasoq norskit oqartussaasuisa piumasaraat, taanna oqarpoq.
Tamannali ilumuunngitsoq, Dag Inge Aarhus oqarpoq.
- Umiarsuup putoqarnera angallasseqqusaajunnaarallartinneqarneranut kisimi peqqutaasimagaluarpat angallasseqqilerneranik kinguneqartumik qularnanngitsumik aaqqissorneqalertorsimassagaluarpoq, aaqqissugassanilli ajoquterpassuaqarpoq, taanna Svalbardpostenimut oqarpoq.
Perngaajunngitsumik angallasseqqusaajunnaarallartinneqartoq
”Ocean Atlantic” Inngikitsuliartigani Skotlandimi aamma avalaqqusaajunnaarallartinneqarpoq.
Inuttat umiarsuarmi isumannaallisaanermut tunngasunik ilisimaqangitsutut Skotlandimi umiarsualiveqarfinnut oqartussaasuinit nalilerneqareersullu taama maajip 22-anni pisoqarpoq.
- Aatsaavissuaq taama nalaassivunga. Inuttat isumannaallisaanermik sungiusaramik angusinngimmata umiarsuaq umiarsualiveqarfinnut oqartussaasunit akiliisussanngortinneqarpoq, Søren Rasmussen KNR-imut allappoq.
Inuttalli isumannaatsumik imarsiorsinnaaqqilertut nalilerneqarmat
