Takornariarpassuit saperngupput

Islandimi qaqqap innermik anitsisup arsakui, silaanarmiittut pissutaallutik Nunatsinnut silaannakkut angallannermut unitsitsilluinnarput.

Nuummi Hotel Hans Egedemi inissisimasut 100-it missaanniittut Danmarkimut ingerlaqqinneq ajuleqqapput. Taakku ilaat Lena Orelius sisamanngormalli saperngusoq. Taassuma nalulluinnarpaa qaqugu ilaquttani takoqqissanerlugit.

-Misikkareqaanga, ilaquttakka qanoq innersut eqqarsaatigeqaakka, sulerinersut sunersut, piffissarlu ilaginissaraluannut annaasara aamma eqqarsaatiginngitsuunngilara, Lena Orelius sisamanngormalli saperngusoq oqarpoq.

Taassuma atorfini aqqutigalugu qatserisartut atisassaannik ilusilersuiartorluni Nuummiippoq.

Nuummiinnaanngitsoq sapernusoqarpoq, Danmarkimi Lemvig Gymnasiummimi atuartut 30-t Aasianni aamma sisamanngormalli saperngulerput. Atuartulli inissisimanertik tigulluarpaat, sapernunerli sivisunerulissagaluarpat atuartunut kinguneqarnerluttussaasoq, ilinniartitsisuat Søren Udesen oqaluttuarpoq.

- Kinguaattoorneq sivitsoqqissagaluarpat kingunerisassai annilaanngatigaagut, ukumi ilinniarnertuunngorniat 2. g-mi naamassilersut misilitsittussaapput, tassungalu atatillugu suliaminnik tunniussisussaallutik. Ilai ilaquttaminnik apersortittoorput, ataaseq akunnaalliliilluni maani inuuissiorpoq. Minnerunngitsumillu pitsaanerpaani assammik arsartartoq lemvig sinnerlugu peqataanngitsoortoq aamma uggornarpoq. Ilaquttagut maqaasivagut kisiat allatut ajornarmat pisussaannartut isigisariaqarparput, Søren Udesen oqarpoq.