Takornariaqarnikkut suleqatigiinnerup kattunneqarnissaa kinguneqassaaq
Nunatta Islandip Savalimmiullu akornanni takornariaqarnikkut suleqatigiiffiit sisamaasut kattutsinneqassapput, kattussuunnissarlu nunat pingasut takornariaqarnermut naalakkersuisuinit siorna septembarimili akuersissutigineqarpoq. Taamaattorli kattutsitsinissap kingunissaanut, nunatta Islandillu akornanni takornariaqarnikkut suleqatigiinnermik aallartitseqataasimasoq Gudmund Thorsteinsson mianersoqqussuteqarpoq:
- Isumaqarpunga aaqqissuusineq ataaserujussuanngortinneqarpat ataasiakkaat akornanni suleqatigiinneq tammassasoq.
Takornariaqarnikkut suleqatigiinnerup pisariillisarneqarnissaanik nunatta Savalimmiut Islandillu takornariaqarnermut naalakkersuisui isumaqatigiissuteqarput. Ullumikkut suleqatigiinneq immikkut katillugit 30-nik siulersuisoqartunik aaqqissuussinernut sisamanut assigiinngitsunut agguagaavoq. Suleqatigiiffiit assigiinngitsut sisamat tassaapput Vestnorden Tourist Board, nunatta Savalimmiut Islandillu pingasuullutik suleqatigiiffigisaat, SAMIK, nunatta Islandillu akornanni suleqatigiiffik, taava FITUR, Islandip Savalimmiullu akornanni suleqatigiiffik kiisalu nunatsinnit peqataaffigineqanngitsoq Nordatlantisk Turistselskab.
Suleqatigiiffiit pineqartut kattutsinneqarnissaat maanna sulissutigineqarpoq, Nunallu Avannarliit Killiit Siunnersuisoqatigiiffiat Maniitsumi juunimi ataatsimiilerpat naammassillugu atsioqatigiissutigineqarnissaa naatsorsuutigineqarluni.
Kattunnissaq aningaasaqarnikkut siulersuisoqarnikkullu pisariillisaarinerussangaluartoq illuatungeqarsinnaasoq Gudmund Thorsteinsson isumaqarpoq.
- Paasisinnaavara sipaaruteqartoqarnissaa siunertaammat, sipaarniarnerli suleqatigiinnernut ingerlareersunut ipititsisinnaavoq, suliniutit ingerlareersut ingerlatsivissuarmut ilanngukkunik tammarsinnaammata. Ullumikkullumi teknikkikkut ima siuarsimatigileraluarpugut siulersuisut ataatsimiittarneri qarasaasiakkut toqqaannartumik ingerlanneqarsinnaallutik, tamaalillunilu sipaartoqarluni, Gudmund Thorsteinsson erseqqissaavoq.
