Takornariaqarnerup innarlerneqarnissaa aarleqqutigaat

Takornariaqarneq Alaskami inuussutissarsiutaalluarpoq. Taamaammat nuna feeriartarfissuuvoq, takornariarpassuillu pinngortitarsuarmik ukiut tamaasa takusaasarput. Kisianni nunap qeriuaannartup aakkiartornerata kinguneranik takornariaqarnerup innarlerneqarnissaa aarleqqutigineqalerpoq.
februaarip 20-at 2011 15:11

Silap pissusaata allanngoriartornera pissutaalluni Alaska maanna allanngoriartorpoq, nunataanilu tamanna takuneqarsinnaavoq. Qeriuaannartuugaluit arlalissuit aakkiartulersimapput, nunanilu allanngutsaaliukkani aqqusinerni arlalinni marulluk sisoortarpoq, bussit takornarianik angallassisut tamaanaarsinnaajunnaarsinnaallutik.

Sumiiffippassuarni soqanngivissimagaluartuni orpikkat maanna aamma naajoralersimapput. Naasut siornatigut takuneqanngisaannarsimasut aamma takussaalerput.

Taamatuttaaq uumasut sikup qanittuani uumasuusut, aamma ikiliartortut, nalunaarusiami nutaami, USA-mi nunat allanngutsaaliukkat allaffeqarfiannit suliarineqarsimasumi atuarneqarsinnaavoq.

Naalagaaffinnut allanut naleqqiullugu Alaskami 1970-ikkunnili kiatsikkiartornerusimavoq, nunallu allanngutsaaliukkat USA-mut atasut pingajorarterutaat marluk Alaskamiimmata silap pissusaata allanngoriartornera Alaskamut sunniuteqartorujussuussaaq, tassami naggueqatigiit Inuppiaat Yupillu, taavalu takornariarpassuit, eqqorneqartussanngorput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq