Assi: Jonas Løvschall-Wedel/KNR

Takornariaqarnerup ineriartortinnissaa periarfissaqarluartoq

Visit Greenlandip siulersuisuani ilaasortaq nutaaq, Arni Gunnarssonip ilaasortat allat peqatigalugit Nunatsinni takornariaqarneq siuarsarniarlugu sulilernissani qilanaaraa.

Taanna timmisartortitseqatigiinni Air Icelandimi pisortaanertut 2005-imili atorfeqartoq aamma Islandimi angalatitsiviit peqatigiifiini ukiuni arfinilinni siulittaasuusimavoq.

- Neriuppunga ilisimasakka Islandimilu misilittakkakka aqqutigalugit Kalaallit Nunaanni takornariaqarnerup siuarsarnissaanut tapersiisinnaassallunga, Arni Gunnarsson KNR-imut oqarpoq.

Nunatsinnut takornariat ukiuni kingullerni amerliartorsimapput, Air Icelandillu pisortaanera naapertorlugu takornariat amerlanerit siunissami ussagalersinnaapput. 

Aamma atuaruk Timmisartukkut angallannermik misilittagaqarluartoq siulersuisunut ilaasortanngorpoq

Tamaattumillu Visit Greenlandip nunatta tuniniarnissaanut suliniutaat pitsaanerusinnaasoq taanna isumaqarpoq.

- Kalaallit Nunaat pillugu tuniniaalluarnerput ingerlatiinnassagutsigu iluatsilluarnerusinnaavugut, aamma Kalaallit Nunaannut utimullu timmisartuussinerit amerlineqartariaqartut isumaqarpunga, Arni Gunnarsson oqarpoq.

Islandimi timmisartortitseqatigiit assigiinngitsut 25-t ullumikkut sumiiffinnut assigiinngitsunut 60-it 70-illu akornanni timmisartuussisarnerat innersuussutigaa, tamannalu Islandimi takornariaqarnerup ineriartornerujussuanut peqqutaaqataasimasoq.

Tamaattumillu Nuummi Ilulissanilu mittarfiit tallineqarnissaat Visit Greenlandimi siulersiusuni ilaasortanngorlaap ilasilluarpaa.

- Mittarfiit tallineqarnerisigut takornariat amerlisinnaasoraakka,  Arni Gunnarsson oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat