Takornariaqarnermik suliaqarnerulernissaq suliniutiginiarneqarpoq
Nalunaarusiaq nutaaq ateqartinneqarpoq ”Nuna tamakkerlugu Takornariartitsinermi iliuusissaq 2008-2010”.
Takornariartitsinerup ineriartortittuarnissaanut pingaarnertigut unamminartut arlallit akuerineqarnissaat pisariaqartutut isigineqarpoq.
Atassuteqaatersuutit immikkut ineriartortinneqarsimasut Kalaallit Nunaanni takornariartitsinermut apeqqutaalluinnarput ullumikkullu sumiiffinnut arlalinnut naleqqiullugit annertuunik unamminartoqarluni – takornariat amerliartuinnartut pissutigalugit aamma maannakkut
atassuteqaatersuutitigut aporfiit pissutigalugit. Tassani pineqarput nunami maani imaatigut silaannakkullu angallannerit pitsanngorsarnissaat.
Imarpissuaq Atlantikoq qulaallugu timmisartunut mittarfiit siunissami sumi inissinneqarnissaat pillugu
suli nalornisoqartillugu ornitassani pingaaruteqartuni arlalinni inuussutissarsiummi tunisassianillu
ineriartortitsinermi piginnaasatigut alliliinermi annertunerusumik aningaasaliinissat ilaatigut
killilerneqartarput. Taamaattumik nalinginnaasumik takornariaqarnerpaaffiup avataani takornarianik kajungilertitsinissamut pisariaqartitsineqartoq oqaatigineqarpoq.
Takornariaqarneq inuussutissarsiutaanerulissappat suliffeqarfiit, kattuffiit inuillu assigiinngitsorpassuit,
assersuutigalugu suliaqarfiit suleqatigiinnissaannut assigiinngitsorujussuarnik tunngaveqartut, aamma suleqatigiinnerulersinneqassapput.
Inuit kiffartuussisussat oqaatsitigut pisariaqartutigut piginnaasaqalernissaat aamma qulakkeerneqartussanut ilaatinneqarpoq.
Naalakkersuisut kissaatigaat takornariartitsinermik ingerlataqarfiup inuiaqatigiit aningaasaqarnerannut
pingaaruteqarnera ukiut tulleriiaat iluanni malunnaatilimmik annertusissasoq, taamaalilluni
maannakkornit suli annertunerusumik Kalaallit Nunaata aningaasaqarnerani sukani napatitsisuulissalluni.
Inuussutissarsiornermut Pisortaqarfiup takornariaqarnermi suliniutit pillugit nalunaarusiaa tamakkerlugu Namminersornerullutik Oqartussat nittartagaanni www.nanoq.gl-imi atuarneqarsinnaavoq.
