Video: Suliffissarsiortut Ilulissani takornarianut issiaartarfiliortut
Palletikunit aamma qisunnit igitanit issiaarfiliat Ilulissani illoqarfiup qeqqani ulluni makkunani takussaalerput.
Suliffissarsiortut arfineq-marluk, Avannaata Kommunianit Ilulissani sulinermik misiliisinneqartut, pallet-ikunik isaterillutik, pilattuillutik, kaatarlutik qalipaallutillu ulluni makkunani ulapileruttorput.
Suliffissarsiortut ilaannut, sulinermillu misiliisumut, Johansigne Petersenimut, assassorluni sulisartunngorsinnaanermik eqqarsaasersorneq issiaarfiliornerani takkutillattaaleqqavoq.
- Tassa pissanganartua. Eqqarsaatigerusaarparput immaqa tamatta. Arlaatigut pikkorissaqqilaarluta. Ilaqaratta ilaatigut maskinanik atuinissaminnut ersilaartunik, Johansigne Petersen, assassorluni sananermik aatsaat misiliisoq, qungujulalluni oqarpoq.
Suliniut Namminersorlutik Oqartussanit 500.000 koruuninik aningaasaliiffigineqartoq septembarip qaammataata tungaanut ingerlanneqassasoq naatsorsuutigineqarpoq.
Avannaata Kommuniata inuussutissarsiornermut ataatsimiititaliaata takornariat ornittagaanni imaluunniit illoqarfiup qeqqani issiaarfiusinnaasunik sanasoqarnissaa aalajangigaraa.
