Takornarianik angallassisartut ilinniarfillu ilaqutariinnit assortuussutaasoq
Takornarianik angallassisussat Danmarkimit amerlavallaat tikisinneqartartut kalaallinik inuusuttunik taarserneqarnissaat, Siumut sinnerlugu Inatsisartunut qineqqusaartup, Berhardt Olsenip allanngortikkusuppaa imaalillugu, takornarialerinermut ilinniarfik Qaqortumit Ilulissanut nuullugu.
Tamannali Berhardt Olsenip paniata Nivi Olsenip, Demokraatit sinnerlugit Inatsisartunut qineqqusaartup isumaqatiginngilaa oqarluni, ilinniarfik Qaqortumit nuunnagu taanna inerisarneqarpat pitsaanerussasoq.
- Atuarfiup taama inerisarneqareertigereernera eqqarsaatigalugu nuunneqarnissaa isumaqatiginngilara, tassami takornarianik sullissineq eqqarsaatigalugu Ilulissani tamanna inerisarneqarpat pitsaanerusutut isigigakku, Nivi Olsen oqarpoq.
AAMMA ATUARUK Ilulissani qineqqusaarneq takoqqiguk
Taanna Inuit Ataqatigiit sinnerlugit Inatsisartunut qineqqusaartumit, Bendt B. Kristiansenimit aamma Iluliarmiumit isumaqatigineqarpoq. Taanna isumaqarpoq, Qaqortumi ilinniartut naammassinermi kingorna, takornarianillu sullissinissamut piumassuseqarluarunik, Ilulissanut nuunnerminni pitsanngorsaaqataasinnaalluartut.
- Takornarialerinermik ilinniarfik pitsaasumik aaqqissuussaappat sumiinnera apeqqutaanngilaq. Pingaarnerpaavorlu ilinniartut suliffinnik misiliiffissaqartuarnissaat inissaqartittuarnissaallu aamma Ilulissani, Bendt B. Kristiansen oqarpoq.
Takornarialerinermik ilinniagaqartut aasaanerani sulisarnissaat ilinniakkamut ilaareersoq
Kujataani takornariartitsinermik suliffeqarfiutillip, Pitsi Petrine H. Høeghip aamma Inatsisartunut Siumut sinnerlugu qineqqusaartup, ilinniarfiup sumiissinnaaneranut siunnersuummut arlaannaannulluunniit illersuerusunngilaq. Taamaattorli oqaatigalugu, Qaqortumi ilinniarfik ukiut taama amerlatigisut atoreersoq toqqammavilerneqarluareersorlu nuunnagu, siuarsarluarneqarpat tamanna Nunatsinnut tamarmut iluaqutaasinnaammat.
- Assersuutigisinnaavara, ilinniartut sisamat Ilulissanit Qaqortumut atuartut aasaanerani Ilulissanut angerlarsinnaasut suliartorlutillu aamma naatsorsuutigineqarsinnaavoq taakku naammassigunik illoqarfimminnut angerlarnissaat. Tassalu takornariaqarnermi ilinniarfiup tamanna siunertaraa. Aamma oqaatigissavara, takornarialerinermik ilinniarfik pilersinneqarpoq, ilinniartut aasakkut sulisarnissaa siunertarineqarluni, Siumut sinnerlugu Inatsisartunut qiningassanngortittoq, Pisti Petrine H. Høegh taama oqarpoq.
