Takorluuisinnaanerit saqqummeriannguaruk

Oqaluttualiornermik unammisitsineq, Allatta! naammassingajalerpoq, ullullu arfineq pingasut qaangiuppata nassiussinissamut ulloq tunniussivissaq kingulliussaaq.
Allattoq Mads Lynge
novembarip 21-at 2012 06:43

Nunatsinni inuusuttut 15-it 25-llu akornanni ukiullit, pissanganartumik tiguartinnartumillu oqaluttualiorniartut peqataasinnaapput, qulequtarineqartorlu tassaalluni "Inuusuttut - nunatsinni nunarsuarmilu".

Oqaluttualiaq 20-t angullugit qupperneqassaaq, decembarillu aallaqqaataani kingusinnerpaamik, allatta@tuavi.net-imut nassiunneqarsimassalluni.

Naak tunniussinissamut killigititaasumut ullut arfineq pingasuinnanngoraluartut, oqaluttualiat arfiniliinnaat tunniunneqartut, NAPA-mi tusagassiisartoq Katja Vahl oqarpoq, taassuma neriuutigaa Nunatsinni inuusuttut oqaluttualiaminnik inaarsaallutik maanna ulapputileruttorsimassasut, oqaluttualiat nalilersugassat taamaalillutik amerlaneruniassammata.

Oqaluttuat allalluagaanerpaat qulit toqqarneqassapput, oqaluttualiortuilu tamarmik immikkut 2.500 koruuninik akissarsitinneqassallutik.

Taakku allannermut Kangerlussuarmi februaari qaammat pikkorissartinneqassapput, soorlu aamma oqaluttualiaat ataatsimoortillugit saqummersinneqassasut.

- Inuusuttut oqaluttualiornissamut kajuminnerulersinniarlugit akissarsiassat ilaneqarput, oqaluttuammi allalluagaanerpaat pingasut, Göteborgimi bogmessemut peqataanissamut bilitsinik eqquisinnaassagamik. NAPA-p pisortaa Leise Johnsen oqarpoq.

Tassa imaappoq: 15-it 25-llu akornanni ukioqaruit quppernerit 20-t angullugit qupperneqartumik oqaluttualiorit, allatta@tuavi.net -imullu decembarip aallaqqaataatinnagu nassiullugu.

Unammisitsineq pillugu annerusumik paasisaqarusukkuit www.napa.gl alakkarsinnaavat.

Aamma atuaruk