Takoqqusaarineq annertooq aaqqissuisumit ujartorneqarpoq
Puisit amiinik atisaliat nunatsinneersut pillugit paasissutissiisoqarnissaa inuiaqatigiit ataatsimoorlutik kivittariaqaraat, Lotte Freddie atisat nutaaliat pillugit ukiuni kingullerni 30-ni kingullerni aviisini allaaserinittartoq isumaqarpoq.
Nickie Isaksenip Great Greenlandip tunisassiaanik ilusilersuinera kusanarlunilu mutioqaaq, Great Greenlandilli tunisassiai tunisaalluassappata tamanna naammanngilaq, Lotte Freddie oqarpoq.
- Takoqqusaarinerit paasissutissiinerillu annertunerujussuarmik ingerlanneqartariaqarput, taamaasiornissarlu Great Greenlandip maannamut pikkoriffigisimanngilaa, Lotte Freddie oqarpoq.
Paasissutissiinerillu annertuut Danmarkimiinnanngitsoq ingerlanneqartariaqartut, Lotte Freddie isumaqarpoq.
- Suliffeqarfiit ussassaarinermik suliallit Kalaallillu Nunanni aqutsisut kivitseqataasariaqarput. Lotte Freddie oqarpoq.
Lotte Freddie isumaqarpoq Great Greenlandip tunisassiai kusanartuusut torrattuusullu, puisip amiata periarfissaanik takutitsilluartut.
- Kisiani puisit amiinik aatisaliat tuniniarneqarluarnissaat periarfissagissaaraluarluni atorluarneqannginnera ajunaarnersuartullusooq taaneqarsinnaavoq, periarfissaqaraluaqimmatami, Lotte Freddie oqarpoq.
- Paasissutissiinerit nunani EU-mut ilaasortaaffiusuni akisuatitsisut suliarineqartariaqarput, taamaasiornissamullu kalaallit tamarmik suleqatigiittariaqarput, Lotte Freddie oqarpoq.
- Puisit amii isiginerlugaasorujussuupput. Tamatumunngalu aallaaviupput puisit amii pillugit kukkusumik amiilaarnartumillu toqorarnerartarnerarlugit oqariartorsimanerit, taamakku asuli oqalunnerunersut inuit naluaat iluamik paasissutissiiffigineqarnikuunnginnamik, Lotte Freddie oqarpoq.