Taekwon-Domik unammisartut VM-imi ulloq siulleq angusaqarluarput
Utoqqaasani unammeqataasoq Karl Larsen ippassaq tul-ernermi sølvinnappoq, utoqqasaanilu unammeqataasoq alla, Christian Isaksen, aamma tul-imi bronzennappoq.
Karl Larsen, Christian Isaksen, Johannes Reimer aamma Kunuk Hansen ataatsimoorlutik imminut illersornermi aamma bronzennapput.
Nunarput nunarsuarmi pissartanngorniunnermi iligiiaarluni tul-imik unamminermi angusaqarluarnissamut neriuuteqarsimagaluarpoq. Kisiannili unammisaqattaarnerit aallartinneranni Japanimut unamminermi ajorsartinneqarsimallutik.
- Unamminermi angorusutagut angusimanngikkaluarlugit, utoqqasaat angusaat tulluusimaarutigeqaagut, Lauritz Heilmann Taekwon-domi nunanut allanut unammisartunut sungiusaasoq oqarpoq.
Nunarsuarmi pissartanngorniunnerit Hvideruslandip illoqarfittut pingaarnersaani Minskimi sapaatip akunnerani uani ingerlanneqarput. Unammersuarnermi nunanit 46-init unammisartut 400-t peqataapput.
Ullumi aqagulu frikampimi unammisoqassaaq. Arfininngorpallu utoqqasaat periutsini immikkuullarissuni sakkortussutsimillu takutitsinermi unammeqataassapput.
