Taekwon-domi ujaminnalluassangalereerput
Taekwon-domi unammisartut utoqqasaat nukarliillu nunarsuarmi pissartanngorniunnissaanni Minskimi Hvideruslandimiittumi pisussami kalaallit sisamat peqataassapput. Junioreq ataaseq veteranillu pingasut.
Allattoq Najaaraq Egede
Utoqqasaani, veteraninik taagukkani, peqataassapput Christian Isaksen, Karl Larsen aamma Johannes Reimer. Kunuk Hansen nukarliit, juniorit, sinnerlugit kisimi peqataassaaq.
Minskimi VM-ernissaq pissanngatigineqaqaaq, tassami siorna ujaminnangaatsiarmata.
Kalaallit Nunaanni Taekwon-dorlutik nunanut allanut unammisartunik sungiusaasoq Lauritz Heilmann oqarpoq, ukiormanna kalaallit angusaqarluaqqinnissaat ilimanartoq.
Nunarsuarmi pissartanngorniunneq aggustip 22-aniit 29-anut ingerlanneqassaaq.