Taekwon-Do-mik nunarsuarmi pissartanngorniuttoqarmat bronzennattoqarpoq
Pissartanngorniunnerit Ruslandimi illoqarfimmi Skt. Petersensborgimi ippassaq aallartipput. Kalaallit arfineq-marluk angalaqataasut ilaat ataasiakkaarlutik eqimattakkaarlutillu arfininngornerup oktobarip 17-iata tungaanut unammisaqattaassapput.
Angutinnguaq Tittussen, Qaqortumeersoq Taek-won-Do-mi unammeriaatsimi Tul-imi ippassaq nr. 3-nngorpoq.
Ullumi frikamperluni unammisaqattaarnerni kalaallit angusarissaarpallaanngillat. Steen Rasmussen Nuummeersoq semifinalimut anngukkaluarluni ajorsarpoq, arnartatuaat Tina Nikodemussen, Qaqortumeersoq aamma Johan Peter Halsøe Nuummeersoq siullermik unammereerlutillu ingerlaqqinngitsoorput.
Kalaallit imminut illersoriaatsimik takutitsinerminni ullumi aamma ingerlaqqinngitsoorput.
- Takutitsinissamut sungiusarnikuutigalutik kukkulaarput ingerlaqqinngitsoorlutillu, Taek-won-Domi sungiusaasoq Lauritz Heilmann Ruslandimit oqaluttuarpoq.
Kalaallilli nikallunngillat. Angutinnguaq Tittussen, Qaqortumeersoq aamma Jonathan Jonathansen, Sisimiuneersoq frikampimi aqagu unammissapput, aamma eqimattaakkaarluni takutitsisoqassaaq.