Taasissussisarsimasut Siumup politiinut nalunaarutigissamaarpai

Inatsisartunut ilaasortat taasissussisarsimasutut nassuersimasut politiinut tunniunneqarsinnaanissaat partiip Siumup eqqarsaatigaa. Tamanna Siumukkut ukiortaamut atatillugu oqaaseqaataanni atuarneqarsinnaavoq.
Allattoq Louise M. Kleemann
januaarip 07-at 2009 14:20

Ruth Heilmannip taasissussisarsimanerit pillugit inerniliinera Siumup inatsisartunut ilaasortaatitaanit illuatungilerneqarpoq.

- Inatsisartut siulittaasoqarfiata inatsisartut inatsisaannik unioqqutitsisunut kinguneqartitsinngilluinnartumik aalajangernera Siumup inatsisartuni ilaasortaatitaata isumaqatiginngilluinnarpaa, taamaattumik inatsisartuni ilaasortat inatsimmik unioqqutitsillutik arlaleriarlutik taasisarsimasut Siumup gruppiata politiinut suliassanngortinnissaat suliarigaa, Otto Jeremiassen, Siumup gruppia sinnerlugu ukiortaami oqaaseqaammi allappoq, nangillunilu:

- Inatsisartut suleriaasiata 2009-mi nutarterneqarnissaa Siumup suleqataaffigissavaa, minnerunngitsumik inatsisartuni sulinerup toqqissisimaffiulluni tatiginartumillu ingerlaqqilernissaa siunertaralugu, Otto Jeremiassen allappoq, atornerluisimasullu ingerlaannartumik atuutilersussamik Inatsisartunut ilaasortaajunnaarsinneqassasut tullianik qinersisoqarnissaata tungaanut oqaatigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq