Taasinerni peqquserluttuliornerit inatsisilerituut nalilissavaat
Inatsisartut siulittaasuat Ruth Heilmann allappoq, suliamut tunngatillugu pinerluttulerinermut inatsimmik unioqqutitsisoqarsimanersoq inatsisilerinikkut nalilertinneqassasoq. Tamatuma kingornagut Politimesterip suliamut akuliutsinneqarnissaanut tunngavissaqarnersoq siulittaasoqarfiup aalajangiiffigissavaa.
Ruth Heilmannip erseqqissarpaa, Inatsisartut suleriaasiat pisuni taamaattuni iliuuseqarnissamut periarfissiinngimmat.
Taamaattumik tamanna iluarsiiviginiarlugu taasinernut atatillugu nakkutilliinermut malitassanik atuutilersitsinissaq siunertaralugu siulittaasoqarfik allannguutissatut siunnersuummik saqqummiussaqarniarpoq.
Naalakkersuisunut ilaasortaasimasoq Aleqa Hammond, Siumut, oqaaseqarpoq inatsisartunut ilaasortat pineqartut marluk, suliassap inatsisitigut misissuiffigineqarnerani tunuarallarnissaat, Siumumit innersuussutigineqartoq.
Demokraatit siulittaasuat Jens B. Frederiksen oqaaseqarpoq, parteeqatimi Palle Christiansenip tunuassanerluni nammineerluni aalajangissagaa. Aammattaarli oqaatigalugu Demokraatit isumaqartut, inatsisartuni ilaasortat allat sinnerlugit taasisarnerat kukkusuusoq.
Inatsisartunut ilaasortat marluk taasinerni peqquserluttuliortarsimanerminnik ippassaq nassueruteqareersut, Demokraatineersoq Palle Christiansen aamma Inuit Ataqatigiinneersoq Esmar Bergstrøm marluullutik tamarmik oqarput, Inatsisartunit tunuarniaratik. Inatsisitigulli misissuinerup inernera utaqqimaaqqaarallarniaritsik.
