Demokraatit Taarsiivigitinnissaq isumaqatigiissutigineqartariaqarpoq
Isumaqatigiissut eqquutsinnagu, nunat immallu assinginik Danmarkimi sanaartorfiusup Geodatastyrelsip nunatta imartaata assinginik suliaqarnerata unittooqqanera uggornartoq, illuatungiliuttut Demokraatit isumaqarput.
Isumaqatigiissutillu atuuttup naammassineqannginneranut Nunatta arlaatigut taarsiivigineqarnissaa isumaqatigiinniutigineqarnissaa, Demokraatit neriuutigaat.
- Pisariaqarput uku neriorsuutigineqarsimasut naammassinissaat, taamaammat isumaqarpunga Naalakkersuisuninngaanniit maanngaanniit killiffissiuisoqartariaqartoq danskit ministerii ilagalugit, Demokraatit siulittaasuat Randi Vestergaard Evaldsen oqarpoq.
AAMMA ATUARUK Immap assingi pillugit isumaqatigiissuteqaqqinnissaq sivisunaarukkaat
Nunatsinni immap assinginik 73-inik suliaqassalluni, taakkulu 2018-imi naammassineqassasut, Danmarkip Nunatsinnut ukiut arfineq pingasut matuma siorna isumaqatigiissuteqarnermini neriorsuutigaa.
Taakkunanngali 32-nnaat maannamut naammassineqarput suliarlu unittooqqavoq.
Isumaqatigiissutillu naammassineqanngimmatta, nunatta taarsiissutitut taaneqarsinnaasumik tunineqarsinnaanera, Danskit silap pissusianut nukissiuuteqarnermullu ministeriata, Lars Christian Lilleholtip, ammaffigigaa, KNR-imit oqaluttuarereerparput.
Sulili isumaqatigiinniartoqarmat suna taarsiissutigineqassanersoq taassuma oqaaseqarfigerusunngilaa.
- Arlaatigut taarsiivigitinnissaq isumaqatigiissutigineqartariaqarpoq. Isumaqatigiissutigineqarsimasoq uniuutsinneqarpoq, kinguneqartariaqarporlu taanna, Randi Vestergaard Evaldsen oqarpoq.
AAMMA ATUARUK Immap assinginik suliaqarneq unittooqqaffiusoq
Immap assingi nutaat atorlugit nunatta sineriaa atuarlugu angallanneq isumannaannerulissasoq siunertaagaluarpoq.
Taakkuali amigaataanerat inuup inuuneranik naleqarsinnaasoq, Folketingimut ilaasortap Inuit Ataqatigiinneersup Aaja Chemnitz Larsenip aviisimut Politikenimut oqaatigereerpaa.
- Nunatsinni atorfissaqartippagut, aamma nunatsinni politikkikkut taanna tamattaalluta isumaqatigiissutigisuuarput, taamaammat soorunami neriuppunga piareernissaa sukkasuumik suliarineqassasoq, Demokraatit siulittaasuat Randi Vestergaard Evaldsen oqarpoq.
Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu naalakkersuisoq, Erik Jensen, isumaqatigiinniarnerit pillugit KNR-imit oqaaseqartinniaraluarparput, iluatsinngittumik.
