Immap assinginik suliaqarneq unittooqqaffiusoq

Aviisi Politiken taama allaaserisaqarpoq.

Danmarkip Nunatsinnut 2009-mi neriorsuutigaa immap assinginik 73-inik suliaqartoqassasoq taakkulu 2018-ip naanerani tunniunneqassasut. Immap assinginik suliaqarnermi Nunatta sineriaatigut angallanneq isumannaannerulersinniarneqarpoq.

Danskilli naalakkersuisuisa Geodatastyrelsip Københavnimit Aalborgimut nuunneqarnissaanik aalajangiinerat pissutigalugu, immap assinginik suliaqartunit 15-iusunit ataasiinnaq Aalborgimut nooqataasimavoq.

AAMMA ATUARUK Namminersorlutik oqartussat nutaamik isumaqatigiissusiortut

Sulisunillu nutaanik atorfinitsitsisoqaraluartoq, taakku immap assinginik suliaqarnermik ilinniartinnissaat sivisuvoq. Taamaammat immap assinginit 73-iusussanit 32-nnaat aqutsisoqarfiup ukiut arfineq-pingasut ingerlanerini naammassisinnaasimavai suliaqarneralu maanna unittuueqqavoq.

Immap assingisa amigaataanerat kingunerlutsitserujussuarsinnaasoq, Folketingimut ilaasortaq Inuit Ataqatigiinneersoq Aaja Chemnitz Larsen oqarpoq.

-  Tamanna inuup inuuneranik akeqarsinnaasoq oqaatigereernikuuara, sulilu taama isumaqarpunga.

AAMMA ATUARUK Politikerit: Nunap assingi pillugit Danmarkimut isumaqatigiissut nutarterneqassanngilaq

Enhedslistenip taamatut inissisimasoqarnera aamma "kusanaatsuliornertut" taavaa, Dansk Folkepartiillu Nunatsinnut tunngasunut oqaaseqartartua Søren Espersen isumaqarpoq danskit naalakkersuisui sapingisartik tamaat iliuuseqartut.

- Danskit naalakkersuisui sapinngisartik tamaat iliuuseqarput. Taamatut pisoqarnera uggornarpoq, umiarsuilli imartani assiliorneqarsimanngitsuni angalasarnerat Folketingip akisussaaffigisinnaanngilaa.

AAMMA ATUARUK Ministeri: Kalaallit Nunaannut immap assingi nutaat qaqugu piariissanersut nalunarallarpoq