Taarsiissuteqarnissaminut USA piareeqqasimavoq
1968-imi timmisartup nakkarnernerani ajutoornerup kingorna qallunaat ajoquserneqartut taarsiiffitinnissaannut USA piumassuseqarsimagaluarpoq. Taamaattorli qallunaat naalakkersuisuisa qallunaat sulisartut taarsiiffigitinnissaat piumasarisimanagu, taarsiissutigineqartussallu atorneqaratik uninngaannarput, eqqartuussissusserisoq amerikamiu Ian Anderson, Thulemi sulisartuusimasut taarsiiffigitinnissaannik suliaqartoq oqarpoq.
Amerikamiut naalakkersuisuisa taarsiissuteqarsinnaanerminnut allagaat 1968-imi amerikamiut Københavnimi aallartitaqarfiannut nassuinneqarsimasut, radioaviismit pigivagut. Allakkami tassani qallunaat taarsiiffigitinnissamik piumasaqassagaluarpata periuserineqartussaq allasserineqarpoq.
Kalaallit qallunaallu sulisartui Pituffiup eqqaani 1968-imi sulisut ajoquserneqartut ajunaarnerullu kingorna toqusut ilaqutaasa kingornussassannik 15.000 dollarsinik taarsiiffigitinissaat siunnersuutitaasimavoq.
Thule-mi sulisartuusimasut 1968-imi ajunaarneq pillugu ataatsimeeqqammerput, maannakkullu qallunaat naalakersuisui pillugit EU-imi eqqartuussiviit qullersaanni eqqartuussineqarnissaq ataatsimiinnermi eqqartorneqarluni.
USAp taarsiissuteqarniarluni piareersimaneranik takussutissap EU eqqartuussivianut tunniunneqassaa, sulisartuusimasullu peqqissusiannik ukiumoortumik misissortittarnissaaat eqqartuussinissami piumasarineqarput.
Timmisartup nakkarnerata nalaani ukioq 1968-imi Thulemi sulisartut qallunaat 1200-uupput, ullumikkut sulisartuusimasut 500-it ajunngillat, amerlanerpaartaat kræftemik nappaateqarlutik toqupput.
Qallunaat naalakkersuiui ulloq manna tikillugu USA-p taarsiissuteqarniarluni piareersimaneranik uppernarsaatit saqqummiunneqarnissaat akueriumanngilaat.
