TAAQ Sisimiuni Nuummilu tusarnaartitsissapput

Nipilersoqatigiit ilisimaneqarluartut Taaq tallimanngorpat Sisimiuni, arfininngorpallu Nuummi tusarnaartitsissapput.
Allattoq Mads Pedersen
februaarip 01-at 2012 13:25

Nipilersoqatigiit Taaq sisamanngornermi  februarip  aappaanni  Sisimiunut tikissapput, tallimanngornermilu Sisimiuni appisimaassallutik. Arfininngornermi februarip sisamaani Nuummukassapput unnukkuanilu Katuami appisimaassallutik.

- Siorna Aasianni Nuummilu tusarnaartitsigatta nuanneqaaq, tupallannalaarporlu tusarnaarianit tigulluarneqarnerput. Taamaammat Sisimiuni Nuummilu tusarnaartitsinissaq qilanaaraara, piffissaraasiit nallerpat pissanganeq aatsaat takkukkumaarpoq, erinarsortoq Knud Mathiassen KNR.gl-imut oqarpoq.

TAAQ 1995-mi Melos Record aqqutigalugu nuusioqqaarput atserlugu ”Sapilerseqaarma”, 1997-mi Sermit Records aqqutigalugu aappassaaneerlutik nuusiorput, taannalu ateqarpoq ”Isaavissuaq”.

Nipilersoqatigiit TAAQ nalunnginneqaataasa ilagaat, 90-ikkunni nuannarineqarnerpaat ilaat ”Uungalu Saninnut Pillutit Asaqqilaannga” kiisalu ”Nammineerusunneq” taallaasa ilaat "sussa sialuit tukkalarpata" tusaqqoorneqartaqisut. 90-ikkunni TAAQ nipilersortartut nuannarineqarnerpaat ilagaat.

Knud Mathiassenip aamma oqaatigaa Ilulissanut appisimaariallattaasarnerup saniatigut nammineerluni immiusserujoortarluni. Nuusiornissarli tuaviuutinngilaa, 2010-mi meerartaarnikuunini pissutigalugu.

Taaq appisimaalerpat nipilersoqatigiit inuttarissavaat:
Knud Mathiassen, erinarsortoq ,
Thomas Lange, guitarertoq
Karl Enok Mathiassenguitarertoq
Marius Sandgreen, pattattoq
Peter Hendriksen, qatitoortoq
Julius Larsen, tumerparpaartoq.