Nuummi ippassaq qamittoornermut patsisaasoq Nukissiorfimmiut maanna paasigaat Taamaammat Nuummi qamittoortoqartoq

Sarfap aqqutaanik qulimiguulit atorlugu Nukissiorfimmeersut ullumikkut decemberip ulluisa 29.-anni misissuipput, paasineqarporlu Ameralik ikaarlugu kangerluup qulaatigoortumi ingerlatsisup katassimanera, tamannalu qamittoornermut patsisaavoq.

Nukissiorfiit tusagassiuutinut nalunaarput.

Sarfap aqqutaa immikkut sillimmatitut atuuttumik ingerlatsissummik ilassuteqartillugu sananeqaateqarpoq, tassalu ajornartorsiutinik pinngortoqassappat taamaaliortoqarpoq, taamaattumillu ajornartorsiut Nukissiorfiit iluarsisinnaasimavaa. Taamaattumik ajornartorsiutip anigornissaa sivisujunnaarsorineqarpoq.

Teknikkimut pisortaq Filip Sivertsen pisoqarneq pillugu ima oqaaseqarpoq:

“Sarfap aqqutaanik ilassutitut ingerlatsissut Utoqqarmiut Kangerluarsunnguanit erngup nukinganik nukissiorfik aqqutigalugu pilersuinerup pilerseqqinnissaanut ingerlattakkamik pisariillisaavoq”. 
Anoreqarnera aamma silap qanoq issusia apeqqutaallutik Nukissiorfiit nammineq sulianut tunngasunut sulisorisaminik, kiisalu Norgemit nakkutilliisunik ikiorserneqarluni sapaatip akunnerata ataatsip iluani suliaq isumagisinnaassavaa.”

Nuummut, Nuussuarmut aamma Qinngutsinnut innaallagissamik, imermik aamma kiassarnermik pilersuineq ileqqumisut ileqqippoq, maannakkorpiarlu Nuummi ajutoortoqarnermi innaallagissiorfimmit pilersuisoqarpoq.

Nukissiorfimmiut suli assupilussuaq suliaqarput, qamittoornerullu nalaani innuttaasut tamaasa paasininnerannut aamma ikiuinerannut assut qutsaviginnikkusuppoq. 
Sarfamik kiassarneqartut, kiassaatit nillersimaneri aamma kissanniaasaaqqaarsinnaaneri Nukissiorfimmiut Facebookkikkut erseqqissaatigaat.

Tamanna peqqutaalluni angerlarsimaffiit naliginnaasumik kiatseqqinnissaat akunnialunnik sivisussuseqarsinnaasoq ilanngulugu Nukissiorfimmiut nalunaarutigaat.
 

Nukissiorfiit KNR-mit attavigineqarput, taakkuli aqagu decemberip ulluisa 30.-anni aatsaat annerusumik paasissutissiiniarlutik nalunaarput.