IA: Taaguut naalakkersuisoq allanngortinneqassappat inuiaqatigiit tusarfigineqartariaqarput

- Siunnersuutigineqartoq inuiaqatigiit naalakkersuisullu akornanni oqallisigineqaqqaartariaqarpoq. Imaannginnami taaguummik allanngortitsigaani aamma taaguutip isumaa suliallu imaat allanngussasut, Aqqaluaq B. Egede oqarpoq.

Suleqatigiissitsisunit Inatsisartunut ilaasortaq Tillie Martinussen taaguummik allannguinissamik siunnersuuteqartuuvoq.

Taassuma taaguut ´Naalakkersuisoq´ naalakkeerpalaarpallaartumik aalajangiisoorpalaarpallaartumillu aallaaveqarsoraa. Taamaammat ´Kiffartuussisoq´-mik taarserneqassasoq siunnersuutigaa.

Taaguummilli allanngortitsiniaraanni inuiaqatigiit qulequttamut isumaat tusarneqaqqaartariaqartoq, Aqqaluaq B. Egede isumaqarpoq.

- Oqaaseq "naalakkersuisoq" inuiaqatigiinnit oqallisigineqartariaqartoq isumaqarfigineqarpat, taava Inatsisartut ataatsimiittarfianni oqallisigisinnaagipput isumaqarpunga, Aqqaluaq B. Egede oqarpoq.

IA: Qulequtaq inuiaqatigiit tamatta aalajangiiffigeqataasariaqarparput

Taassuma Inuit Ataqatigiit siunnersuummut tapersiissanersut massakkut oqaatigisinnaanngilaa.

-Siunnersuut peqataaffigerusunneripput malaannarlunga oqaatigisinnaanngilara. Eqqartorneqartoq taaguummut tunngaannanngilaq, tassami naalakkersuisoqarfiit taaguusersorneqarnerat demokratiip iluaniilluinnarmat. Taaguut allanngussappat, oqaloqatigiinnerit paasititsiniaanerillu annertunerit suliarineqartariaqarput, Aqqaluaq B. Egede oqarpoq.

AAMMA ATUARUK Tillie Martinussen: Taaguut Naalakkersuisoq kiffartuussisumik taarserli

KNR-ip Siumumi sulittaasup tullersortaa Karl-Kristian Kruse attaveqarfiginikuuaa.

Siumut siunnersuummik tapersiinavianngitsoq taanna oqarpoq.

Danmarkimik naalagaaffeqateqarnerup Suleqatigiissitsisunit atuutiinnartinneqarusunnera eqqarsaatigalugu, oqaatsip "naalakkersuisoq" "kiffartuussisoq"-mik taarserneqarnissaa tulluanngitsoq, Karl-Kristian Kruse isumaqarpoq.

Siunnersuut Inatsisartut ukiakkut ataatsimiinneranni pilersaarutit malillugit novembarip ulluisa 24-anni oqaluuserineqassaaq.

"Ajunngilluinnarpoq!"

Knr.gl-ikkut Facebookikkullu oqaaseqarlutik allassimasut akornannni kiffartuussisumut aamma tapersiisoqarpoq.

"Tille ilumoorluinnarpoq, politikerit inunnut kiffartuussisussaallutik illuanuunngitsorlu eqqaamassavaat!", Peter Hansen ilaatigut allappoq.

"Siunnersuut ajunngilluinnarpoq!", Flemming Nielsen oqarpoq.

"Siunnersuutitsialak. Amerliartuinnartummi inuiaqatigiinnut "kiffartuussisuullutik" eqqaasinneqartariaqalerput", Bjarne Ljungdahl allappoq.

Kikkulli tamarmik qarasaasiakkut ersaattaassinngillat.

Matis Petersen knr.gl-ip Facebookimi qupperneratigut allappoq: "Isumaginninnermut susassaqarfinni unammillernartut eqqarsaatigalugit qinikkanit oqallisigineqarnissaat kissaatiginarpoq". 

Inatsisartut ukiakkut ataatsimiinnerat septembarip ulluisa 25-anni aallartissaaq.