Tûgdlik pillugu suliaq nanginneqarpoq
- Qaammammi ataatsimi marlunniluunniit suliassaq pineqanngilaq, sivisunerujussuusinnaavorli, Johan Westen ulloq unnuarlu paaqqinnittarfimmi Tûgdlimmi suliassani nakuusernernut tunngasuni paasiniaaneq pillugu oqarpoq.
Nuummi Politiit naapertorlugit suliassaq ukiarmi suliassat allat nukinginnartut pissutigalugit unitsinneqarallarsimavoq. Ippassarli suliassamik suliarinnittartut marluk suliassamik aallartitseqqittut Johan Westenip paasissutissiissutigaa.
Paasiniaanermi aqutsisoq naapertorlugu siusinnerusukkut sulisuusimasunik meeqqanillu inissinneqarsimasunik ilisimannittunik ikinnerpaamik qulinik politiit suli apersugassaqarput.
- Ilisimannittut ullumikkut nunatsinni Danmarkimilu siammarsimammata suliassaq sivisuumik suliassaasoq Johan Westen KNR-mi radio-aviisimut oqarpoq.
Umiarsuaaqqamut ilinniarfiusumut namminersortumit pigineqartumut Tûgdlik-mut paaqqinninnissamut akuersissut Namminersorlutik Oqartussat apriilimi atorunnaarsimmassuk paasiniaasoqalerpoq. Tûgdlik nunatsinni nukappiaqqanut arlalinnut sumiginnarneqarnerpaat pinerluttuliornerpaallu ilaannut 2002-mili angerlarsimaffiulerpoq.
Arlaleriarluni nakkutilliiartorluni takuniaasarnikkut umiarsuaaqqami aamma Nuup Kangerluani Qooqquni immikkoortortaqarfimmi pissutsit `isornartoqartorujussuusut´ oqartussaasunit paasineqarpoq, tamatuma kingorna sulisut marluk nukappiaqqanik arlalinnik nakuusertarsimasutut politiinut nalunaarutigineqarput.
