Tûgdlik: Meeqqat unatarneqarlutillu mattunneqartarsimapput

"Meeqqat tusaalaariarsigit. Allatullu inuuvugut". Taama meeqqat Tûgdlimmiittut januaari 2002-mi tusaaqqullutik taama saaffiginnittut ippassaq radioaviisimi ilanngupparput.

Meeqqat Nuup kommuneaasimasumi isumaginnittoqarfimmi sullissisuminnit tusaaqqupput umiarsuaaqqami atuarfiuutigisumi Tûgdlimmi unatarneqarlutillu sumiginnarneqartarsimagamik, taannaagaluarporlu meeqqanik sumiginnarneqarnerpaanik sullissisussaq.

Suliamut tunngatillugu paasissutissat misissorneranni uppernarsineqarpoq - pisortanit ilisimaneqartumik- unataanerit, mattussinerit sumiginnaanerillu pisarsimasut.

Assersuutigalugu paaqqinnittarfimmi allami perorsaasut marluk meeraq Tûgdlimmiissimasoq 2002-mi aggustimi oqaloqatigereerlugu allapput.

"Nukappiaraq nipaalluinnarluni issiavoq, taattuluppoq, isaasalu atai taartuinnaallutik. Aperigatsinni qanorinnersoq qullililerpoq oqaluttuarlunilu kiinnamigut annersarneqarsimalluni..." Aamma oqaluttuaraa Tunumi ilaquttaminut attaveqaqqusaasimanani.

Taamatullu meeqqat ilaquttaminnut attaveqaqqusaannginnerat meeqqat oqaluttuaanni saqqummeqqittuarpoq.

Anaanaq Ilulissaneersoq 2003-mi oktobarimi kommunerisaminut saaffiginnippoq meeqqami Tûgdlimmiinnini toqqissisimanarinngimmagu. Meeqqat arlallit isanneqartarsimapput aammalu oqaatsit sakkortuut nikassaasut maajunnartullu atorlugit oqaluunneqartarsimapput - anaanaasup meeqqami angerlarnissaa kissaatigisimavaa perorsaariaaseq atorneqartoq toqqissisimanarinnginnamiuk. Siornatigut Ilulissat Kommunerisaat Tûgdliup naalagaanut Tom Augo Lyngemut allappoq.

Pappialani uppernarsaatini aamma takuneqarsinaavoq, meeraqartoq aggustimi 2009-mi sulisunit ima sioorasaarneqarsimasunik: Unatarneqarusunngikkusi, massakkut sianerniaritsi!, ilaatigut oqartoqarsimavoq.

Aamma uppernarsaatit Isumaginninnermut Pisortaqarfiup Ulloq Unnuarlu Angerlarsimaffinnut Immikkoortoqarfianeersut napertorlugit Anaanaq alla aggustimi 2009-mi oqaluttuarsimavoq, ernini piumanngikkaluartoq Tûgdlimmi sulisunit aaneqarsimasoq:

"Sulisut ungusimavaat... anaanaasup oqaluukkaluarpai, isumaginninnermi allaffimmi sulisoq oqaloqatigereeritsik, iluaqutaanngilarli. Nangillunilu allassimavoq: Nukappiaraq imminut illersorluni patittaasariaqarpoq, taamaalillunilu inussamigut kimillalluni. Nukappiaraq anaanarlu ersinermik sajuttuinnaapput, kiagunnerallu ersaasigut kuugaarpoq."

Suliap ingerlanerani paaqqinniffik umiarsuaaqqatut atuarfiutiginermi saniatigut Qooqquni aamma illuaraateqarnissamut akuerineqarpoq. Akuersissutaa aamma annertusineqarpoq meeqqanik qulinik isumaginninnermiit 22-nik isumaginnittussatut. Aamma suliffeqarfittut imminut pigisutut akuerineqarpoq. Tamakkulu tamarmik pineranni pisortat nakkutilliisarput, taasarialimmilli allanngortoqassanani.

Radioaviisini tullinnguuttuni sulisuusimasoq angajoqqaallu, meeqqaminnik Tûgdlimmmititsisimasut, oqaluttuaat tusarumaarpagut.

Radioaviisimiit ilisimaneqarpoq, angajoqqaat meeqqamik Tûgdlimmiinnerat pillugu arlaleriarlutik naammagittaalliortarsimasut. Taakkua tusarfigerusoqaagut, soorluttaaq sulisuusimasut maannalu sulisut saaffiginnissinnaasut uggiuuna: radioavis@knr.gl