"Tûgdlik"-up akuersissutaa atorunnaarsippaat
Namminersorlutik Oqartussat misissuereernerisa kingorna umiarsuaaqqami pissutsit isumakulunnartorujussusut paasineqarmata, umiarsuaaqqap taamatut atuutsinneqarnera atorunnaarsinneqarpoq.
Umiarsuaaqqami angerlarsimaffiutigisumi suut isumakulunnarnersut, Ilaqutariinnermut, Kultureqarnermut, Ilageeqarnermut aamma Naligiissitaanermut Naalakkersuisup, Mimi Karlsenip oqaaseqarfigerusunngikkallarpai, oqaatigaluguli nukappiaqqat pineqartut maanna angerlarsimaffinnut allanut, ilaatigut aamma ulloq unnuarlu paaqqinnittarfimmut Sisimiuniittumut inissinneqareersut.
Tûgdliup taama atorunnaarsinneqarnera, umiarsuaaqqap piginnittuanit, Tom Augo Lyngemit nuannarineqanngeqaaq. Taanna isumaqarpoq, piffissami sivisujaami Namminersorlutik Oqartussanit umiarsuaaraq ajortumik eqqartorneqartarsimasoq, naak umiarsuaaqqap inatsisit malillugit peqqussutaasut malissimagaluarai.
Tom Augo Lyngep ilanngullugu oqaatigaa, aningaasanik annaasaqarnissani pillugu, Namminersorlutik Oqartussat eqqartuussivitsigoortumik tusartinneqarumaartut.