Qeqqani kommunerujussuanngortussaq eqqarsaatigalugu, Maniitsumi kommuneqarfiup allaffiani suliffillit atorfimminnik annaasaqarnavianngillat. Sisimiut Kommuneani borgmesteri Hermann Berthelsen ataatsimeeqatigereerlugu Maniitsup borgmesteria Søren Lyberth oqarpoq.
Kommunit kattussuunneqalerpata Qeqqani kommuneqarfissap qitiusumik allaffeqarfissaa Sisimiuniittussatut siunniunneqarpoq.
Maniitsup borgmesteria Søren Lyberth ima oqarpoq:
- Sulisugut massakkut sumiiffigisaminni issiaannarnissaat qulakkeerneqarnissaa isumaqatigiissutigaarput, Søren Lyberth oqarpoq, nangillunilu:
- Sulisut nuukkumanngitsut arlaatigut suliffimminnik tigumminnissaat qulakkeerumallugu ikaarsaalernerup nalaani pinngitsoornata qulakkeerniarsaraarput, Søren Lyberth oqarpoq.
Sisimiut Kommuneani borgmesteri Hermann Berthelsen suliffissaqartitsiniarnermik qulakkeerinnittoqarnera iluaraa, sulisullu suliffimminnik annaasaqarnissaminnik ernumassutissaqannginnerarlugit:
- Naammaginartorujussuuvoq. Inuit kommunip allaffeqarfissuani atorfillit sumiikkaluaraangataluunniit suliffimminnik ingerlatsiinnarsinnaanissaat qulakkeerneqartariaqarpoq, Sisimiuni borgmesteri Hermann Berthelsen oqarpoq.
Pisortatigoortumik suli atsioqatigiittoqanngilaq, sulisullu ataasiakkaat suli atsioqatigineqarsimanatik.
