Søren Espersen soqutigittaannerarneqarami ajuallappoq

Dansk Folkeparti sinnerlugu folketingimut ilaasortap Søren Espersenip ajuusaarutigaa Inuit Ataqatigiit sinnerlugit sinniisutut folketingimi ilaasortap, Sofie Rossenip Nunatsinnut kalaallinullu soqutigisaqanngitsutut soqutigittaattutullu nalilermani:

- Ajuusaarutigaara Kalaallit Nunaannut Danmarkimullu atatillugu sunut tamanut soqutigisaqannginnerarlunga oqaatigimmanga. Tassami taamaattoqanngilluinarpoq, isumaqataanngiinnartungaana. Aalajangiunneqartunut unneqqarilluta peqataavugut. Kisianni peqataaqqissinnaajunnaartutut misigisimavunga, ingasagilerakku. Naalagaaffeqatigiinnermimi avitseqatigiittarpugut. Maannami aamma taamaaliorpugut. Nordsømi uuliasiornermit milliardinik nalillit qallukkavut aammattaaq Kalaallit Nunaannut iluaqutaapput. Taamaaliornitsigummi nalimmassaaqataavugut, allatummi ilioraluarutta tulluarnavianngimmat.

Danmarki ukiorpassuarni Kalaallit Nunaannut ataatsimoortunik tapiisarnikuummat, taava Kalaallit Nunaat aatsitassarsiornermit isaatitsilerpat Danmarki pissarsitinneqassanngippat aamma tulluarnavianngilaq.

Ajuusaarutigaara namminersorneq pillugu ataatsimiititaliarsuarmi tassunga killittoqarmat.

Kissaatigisimagaluarpara Kalaallit Nunaat naalagaaffeqatigiinnerup iluani namminersulissasoq, Kalaallit Nunaata Danmarkillu peqataaffigisaanik aamma aatsitassat eqqarsaatigalugit, Søren Espersen oqarpoq.

Søren Espersen aammattaaq isumaqarpoq, “Danmarkip naalagaaffiani nunap iluani pisuussutit imaaliallaannaq kalaallinut tunniunneqartut.”