Søren Espersen politikeritut silaatsuunerarpaat

Folketingimi ilaasortaq Dansk Folkepartiiusoq Søren Espersen Demokraatit uparuarpaat politikeritullu silaatsutut taallugu.

Taama Demokraatit uparuaapput, Søren Espersenip Aleqa Hammond assuaralugu oqaaseqareermat.

Oqallinneq tamanna pilerpoq, nunatsinni politiit amerlassusaat eqqartorneqalermat.

Eqqartuussisoqarnermummi Naalakkersuisup Aleqa Hammond-ip erseqqisaatigeqqammerpaa nunatsinni politiit ikippallaarnerarlugit.

Taanna taama oqarmat politimesteri Sten Thomsen akivoq, tamanna eqqunngitsoq atorfiimmigooq tamarmik inuttaqarmata. Taassuma akissummini erseqqissaatigaa Eqqartuussiveqarneq pillugu ataatsimiititaliarsuup politiit atorfeqartinneqartussat 125-t innersuussutigigaluarai taamaattorli taakku sinnerlugit tassa 135-nik politiinik atorfeqartitsillutik.

Taama pisoqarmat Folketingimi ilaasortaq Søren Espersen akuliuppoq, Aleqa Hammond-ilu avoqqaarlerlugu oqarluni Aleqa Hammond oqallinnermut tassunga eqqunngitsunik paasissutissiinerarlugu.

Maannalu Demokraatit Aleqa-mut tapersiillutik akuliupput, Demokraatini ilaasortaq nammineerluni politiitut ilinniagaqartoq Jens B. Frederiksen oqarpoq, Aleqa Hammond taperserini Søren Espersenilu politikkeritut silaatsutut taallugu.

- Inatsisinik atortitsinermut ministerip Lene Espersenip Aleqa Hammondip oqaasii pimooruttariaqaraluarpai, unalu politikeritut silaatsoq Søren Esperseni tusaanagu, Jens B. Frederiksen allaatigisamini taama ilaatigut allappoq.

Taanna nangilluni allakkamini erseqqissaavoq, politiinut atorfiit 125-iunerarlugit oqalunneq Danmarkimut naleqqiussinermik aallaaveqartoq.

- Isumaqarpugut politimesterip danskit tikisittakkat paarlattaasartut politiinngorniartullu kisitsisimini ilanngussimagai, Jens B. Frederiksen allappoq.