Søren Espersen ajortuliunngilaq

Folketingip siulittaasoqarfiani ilaasortat sisamat Dansk Folkepartimeersup Søren Espersenip appisaluunneqarnissaa itigartippaat. Kalaallit folketingimi ilaasortaatitaanut sakkortuunik oqaaseqarsimasutut Søren Espersen appisaluunneqassasoq folketingimi ilaasortat arlallit siulittaasoqarfimmut naammagittaalliutigigaluarpaat. Folketingip siulittaasua Thor Petersen oqarpoq appisaluussinissamut pissutissaqanngitsoq, Lars-Emil Johansen oqaatsit sakkortuut atorlugit saassunneqarami ataatsimeeqataammat akinissaminullu periarfissaqarluni. Februari qiteqquttoq Søren Espersen ilaatigut oqarpoq Lars-Emil Johansen pisarnermisut massuasoq piumagunilu folketingimi ilaasortaajunnaaginnarsinnaasoq. – Tunuarnissaanut arlaannaataluunniit noqinngilaa, nalunngilarali tunuarnavianngitsoq akissarsiani iluatigigamigit, taamani Søren Espersen oqarpoq.

Lars-Emil Johansen februaaip ulluisa 19-ani nammineq oqarpoq Hr. Søren Espersenimit ajortumik pineqartutut misigisimanani. Taama oqarsimanera siulittaasoqarfiup itigartitsinerminut aamma tunngavilersuutiginerarpaa.