Syriap sakkutuujutini piareersimatilerpai

Syriamiut sakkutuui nunaminnik illersuinissaminnut piareersimatinneqalersut, Syriami præsidenti Bashar al-Assad ullumi nalunaaruteqarpoq.

Syriami pissutsinik malinnaasut isumaqarput tamanna oqarluartaarnerinnaasoq.

Syriamiut naalakkersuisuisa eqqaamiumik akersuunnerisa kingunerisaanik nunartik ilanngunneqassasoralugu immikkut sakkutuuliussassatik aggersarlugit aallartissimagaat, Libanonimi aviisi ’an-Nahar’ ullumi saqqummersoq allappoq.

Danmarkimi illersornissamut ministereqarfimmi majori Kenneth Pedersen Kangiani Qiterlermi pisunik malinnaasoq Ritzau-imut oqarpoq, Syriap akersuuttunut akuliunnissaa ilimananngitsoq.

- Syriamiut israelimiunut akeqqiutissallutik qunugaat. Syriamiut sakkuttuui qanganitsersimapput akuliukkaluarunillu erngerlutik suujunnaarsitaassallutik, majori Kenneth Pedersen oqarpoq.

Libanonip Syriallu killeqarfiisa eqqaani israelimiut timmisartumiit ullumi qaartartumeeripput, allallu sakkutuut Libanonip Syriallu illoqarfiisa pingaarnersat Beruitip Damaskusillu tungaanut aqquserngit angallaffiunerpaat israelimiut sakkutuuinit arlaleriarlutik qaartartumeersimallugit.

- Biilit Syriamiit Libanonip tungaanut ingerlaartut tamaasa israelimiut qaartartumeertassavaat, israelimiut illersornissamut ministeriat Amir Peretz oqarpoq.