Syria atomip nukinganik qaartartuliorniarpoq

Korea Avannarleq ukiut arlallit atomitortunik sakkoqareerpoq. Irani atomitortunik sakkutaarniarluni pimoorussivoq, maannakkullu Syria aamma piukkuulerpoq – taamaalilluni præsident Buship nunat ajortumeerinianik taanikuusaasa kingullersaat qaartartuliulerpoq. Taamatut Amerikami inatsisartut isumaqarput.

Taamaammat Syriap inoqajuitsortaani sapaatip akunnerani kingullermi Israeli saassussisimanerarpaat tamaani Syriamiut atomitalinnik sanaartorfiat aserorniarlugu.

PAASISSUTISSIINEQ:

DALET: Syria

Isumaqarpunga suna upperissanerlugu suli oqaatigissallugu siusippallaartoq, Steen Nørskov Jordanip illoqarfiisa pingaarnersaanniit Amman-imiit oqarpoq, nangillunilu – tusakkat allat malillugit saassussinerit allanik pissuteqarput. Syriap atomimik qaartartuliorneraaallutik oqaluttut ilagaat siornatigut USA-p FN-imi ambassadørerimasaa John Bolton. Bolton siornatigut apeqquserneqartartunik ersarissunik isummertarpoq, allaat USA-p isertortumik paasiniaasartui akerlilerniartarlugit, soorlu maanna aamma isertortumik paasiniaasartut oqarput Syria atomimik qaartartuliussamaanngitsoq. Tusatsiakkalli allat oqaatigaat Israelimiut saassussinerat pissuteqartoq Iranimiit Syria aqqusaarlugu Libanonimi Israelip akerartaavinut Hisbollah-mut sakkunik assartuisut saassunneqarsimasut. Hisbollah aasaq sapaatip akunnerini qulini Isralimut sorsuppoq. Tusakkat arlaat tutsuiginarnerussanerpoq, Israelimmi Syria nuna taamak mikitigisoq ukiorpassuarni qulaavaasarlugu misissugariuarpaa, Koreallu Avannarliup kommunistiusup Syriamut ikiuunniarnera ilimananngilaq, taamaammat imaassinnaavoq Iranimiit sakkunik assartuisimaneq uppernarnerusoq.

NAGGASIUT:

DR-ip ilanngutassiaa Ulf Fleischerimit kalaallisuunngortinneqarpoq.