Korea Kujallermi eqqartuussiviup præsidentiusimasoq parnaarussassanngortikkaa

Korea Kujallermi præsidentiusimasup Park Geun-hyep ukiuni 20-ni parnaarussassanngortinneqarnissaanut eqqartuussiviup aalajangernera, Korea Kujallermi eqqartuussiviit qullersaata maanna atuuttussanngortippaa.

Korea Kujallermi nutaarsiassaqartitsivik Yonhap Ritzau naapertorlugu taama allappoq.

Park Geun-hye præsidentitut Korea Kujallermi tunngaviusumik inatsit pillugu eqqartuusivimmit 2017-imi uppisitaavoq.

Akilerneqarluni peqquserluttuliorsimasutut pissaanermillu atorneluisimasutut unnerluutigineqarluni ukiuni 30-ni siullermik pineqaatissinneqarpoq.

Park Geun-hyep eqqartuussivilersuunneqarnera qaammatinik qulinik sivisussuseqarpoq, suliffeqarfiit pissaanilissuit Korea Kujallermilu politikerit arlallit akornanni isertortumik suliat eqqartuussinermi qitiullutik.

Katillugit ukiuni 22-ni parnaarussaaqqassasoq

Park Geun-hyemut suliap eqqartuussivitsigut suliareqqinneqarnissaa, Korea Kujallermi eqqartuussiviit qullersaata 2019-imi aalajangerpaa ukiunilu 30-ni parnaarussassanngortinneqarnera 2020-mi ukiunut 20-nut sivikillineqarluni.

Unnerluussisussaatitaasulli sivikillisitsineq atuutsikkunnaarniarlugu eqqartuussiviit qullersaannut aappassaa suliareqqitassanngortippaat, ukiunili 20-ni parnaarussassanngortinneqarnera tassani atuuttussanngortinneqarluni.

Park Geun-hye katillugit ukiuni 22-ni parnaarussaaqqassaaq, Korea Kujallermimi qinersisarnermut inatsimmik unioqqutitsisimasutut ukiuni marlunni siornatigut parnaarusassanngortinneqarnikuugami.