Sydafrikap inatsisartuisa Cyril Ramaphosa præsidentissatut toqqaraat

Sydafrikap eqqartuussiviata qullersaanni eqqartuussisup taasinnginnermi katersuunnermi Jacob Zumap inuulluaqqussutaa nipituumik atuarpaa.

65-inik ukiulik, Cyril Ramaphosa Cape Townimi inatsisartuni qinersisoqareerneratigut uppernarsaanikkut atorfinitsinneqassaaq.

Jacob Zuma Sydafrikap naalakkersuisuini partiimi ANC-imi decembari tikillugu siulittaasuuvoq, ilaasortalli tunuarnissaa piumasaqaatitagaat. Tamanna Zumap ileqqorlunnerarneqaqattaarnerata kinguneratigut pivoq.

DR-ip Afrikami ilanngutassiortuata Søren Bendixenip præsidentinngortussaq Cyril Ramaphosa ima oqaluttuaraa:

- ANC-p oqaluttuarisaanerani ilisarisimaneqarnerni ilaavoq, taanna ammip qalipaataanik immikkoortitsinerup tassa apartheidip atorunnaarsinneqarnerata nalaani Nelson Mandelap saniani issiavoq.

Sydafrikami naalakkersuinikkut aaqqissuussineq nutaaq suleqataaffigaa, amerlasuullu isumaqarsimagaluarput Mandelap præsidentiunerani tullersortaassasoq. Taamaalinnginnginnamili politikki qimallugu iluatsitsilluartorujussuulluni niuertarfiuteqalerpoq, Sydafrikamilu maanna pisoorsuunerpaat ilagalugu.

Politikkimut maanna uterluarsimalerpoq, ukiuni kingullerni sisamani præsidentimut tullersortaavoq maannalu Sydafrikami præsidentinngortussanngorluni.

Ajortuliornikuunngila?

- 2012-imi piaavimmi akerliuffiusorujussuarmi pisortaavoq, politiit akerliussutsimik takutitsisunut akuliunneranni inuit 34-t toqutaapput. Tamannalu politikkikkut akerlerisaata innuttaasunut takutinniarpaat.

Ileqqorluttunimi ilaanngilaq?

- Aarlerinartunik takussutissanik ersittoqanngilaq, suulli qaffakaatinneqarsinnaaneri ilisimaneqanngisaannarpoq.

Præsidentimut qinersinissaq aappaaguinnanngorpoq, ajugaalluarsinnaavali?

- Ajugaalluarsinnaasoraara. Soorunami tunniussaqassaaq, ANC-li Sydafrikami suli amerlanerussuteqarpoq, taamaammat aappaagu præsidentinngornissaa ilimanarluarsinnaavoq.