Sydafrikami præsidentip kingoraartissaa nassaarineqarpoq
Sydafrikami præsidentiusup Thabo Mbekip kingoraartissaa maanna nassaarineqarpoq, tassaavorlu partiip naalakkersuisuutitaqartup, ANC-p, siulittaasuata tullersortaa, Kgalema Motlanthe.
Allattoq Louise M. Kleemann
septembarip 25-at 2008 12:01
Sydafrikami inatsisit tunngaviusut naapertorlugit eqqartuussivik nalunaaruteqartussaatitaasoq, taama nalunaaruteqarpoq.
Sydafrikami præsidentiusoq Thabo Mbeki præsidentitut ukioq ataaseq suli ingerlaqqissinnaagaluarpoq, ANC-milli tunuaqquneqarnini pissutigalugu ukiumik ataatsimik sioqqutsilluni tunuassaaq.
Præsidentimut aappaagu qinersisoqarnissaata tungaanut Motlanthe præsidentiugallassaaq.
ANC-mi siorna pissaaneqarniuttoqarmat Mbeki Jacob Zumamut ajorsarpoq.
Zumap peqquserluuteqarsimasutut siorna unnerluutigineqarneranut atatillugu Mbekip akuliussimanera ANC-p siulersuisuunerisa arfininngormat tunuaqqusinerannut pissutaavoq.
Zuma Sydafrikami præsidentissatut piukkunneqartuni massakkorpiaq sallersaavoq.
